ჯერემი ალენ უაითთან 2023 წელს გამართული წარუმატებელი შეხვედრის მიუხედავად, მარველი კვლავ ცდილობს, რომ The Bear-ს ვარსკვლავი მარველის კინოსამყაროს შეუერთდეს. წყაროს ცნობით, ემის მფლობელ მსახიობს სტუდიამ "თვალი დაადგა".

თუ ჰოლივუდის მსახიობი ხართ, დიდი შანსია კარიერის გარკვეულ ეტაპზე მარველის სამყაროში აღმოჩნდეთ. ჰოლივუდის მსახიობების ერთი დიდი ნაწილი უკვე ვნახეთ Marvel Studio-ს ფილმების სხვადასხვა ეპიზოდურ როლში ან მათ მე-6 ფაზაში ვიხილავთ. მე-6 ფაზა მარველმა ჯერ კიდევ 2022 წელს დააანონსა და ეტაპობრივად გვაწვდიდა მასში მონაწილე მსახიობების ვინაობის შესახებ ინფორმაციას. როგორც უკვე ვიცით, ახალ ფაზას ფილმი "ფანტასტიკური ოთხეული: პირველი ნაბიჯები" გახსნის, რომელსაც კინოეკრანებზე 2025 წლის 25 ივლისს ვიხილავთ.

მიუხედავად იმისა, რომ მე-6 ფაზაში მონაწილე მსახიობების უმრავლესობა უკვე ვიცით (პედრო პასკალი, ვანესა ქირბი, ჯოზეფ ქუინი, ფლორენს ფიუ, ჯულია გარნერი, რობერტ დაუნი უმცროსი, ქრის ჰემსვორთი, ტომ ჰოლანდი, ტომ ჰიდლსტონი, პოლ რუდი და სხვ.) მარველს ჩვევია სიურპრიზებიც, მაგალითად, ფილმ "Eternal"-ში ჰარი სტაილსის ეპიზოდურ გაელვებაზე პრემიერამდე მაყურებლებს არანაირი ინფორმაცია არ გვქონდა და კინოთეატრებში მისი ნახვა ძალიან მოულოდნელი და სასიამოვნო სიურპრიზი აღმოჩნდა.

ინსაიდერის ცნობით, მსახიობი, რომელიც ახალ სუპერგმირად შეიძლება გავიცნოთ — ჯერემი ალენ უაითია. ფანები ვარაუდობენ, რომ იმ შემთხვევაში თუ მსახიობი მარველის შემოთავაზებით დაინტერესდება, მას მისტერ სინისტერის ან Ghost Buster-ის როლში ვიხილავთ. სხვა დეტალები ჯერჯერობით უცნობია.

რა მოხდა 2023 წელს?

ჰოლივუდის ამომავალი ვარსკვლავებისთვის განსაზღვრული ამჟამინდელი ტრაექტორიის შესახებ მსახიობმა ჟურნალ GQ-სთან ინტერვიუში ისაუბრა. როგორც ჩანს, როდესაც ახალგაზრდა მსახიობი კარიერის მწვერვალს უახლოვდება, მას მაშინვე მარველი ან DC "იტაცებს და სუპერგმირულ სამყაროში ათავსებს".

The Bear

The Bear

ფოტო: Hulu

ემის მფლობელმა მსახიობმა ამავე ინტერვიუში თქვა, რომ ის 2023 წელს ერთხელ უკვე შეხვდა მარველის წარმომადგენლებს და სთხოვა დაესახელებინათ მიზეზი, რატომაც მას მარველის სამყაროში უნდა ეთამაშა, თუმცა ამ შეკითხვამ მათი გაღიზიანება გამოიწვია და, შესაბამისად, შეხვედრაც წარუმატებლად დასრულდა.

ამ დროისთვის, უცნობია, დათანხმდება თუ არა უაითი მარველის შემოთავაზებას, თუმცა შეგახსენებთ, რომ მანამდე მსახიობის ნახვა "The Bear"-ის მეოთხე სეზონში იქნება შესაძლებელი, რომელიც Hulu-ზე 2025 წლის 25 ივნისს გამოვა. გარდა ამისა მას Disney+-ის კიდევ ერთ მსხვილ ფრენჩაიზში, ვარსკვლავური ომების ფილმში ვიხილავთ "მანდალორელი და გროგუ", — არ აგერიოთ სერიალ "The Mandalorian"-ში. ამ ფილმის პრემიერა 2026 წლის 22 მაისს იგეგმება.