შრომის საერთაშორისო ორგანიზაციის მონაცემებით, 25 მილიონი ადამიანი იძულებით შრომის პირობებში ცხოვრობს ხოლო, 15 მილიონი კი საკუთარი ნება-სურვილის საწინააღმდეგო ქორწინებაში იმყოფება.

შრომის საერთაშორისო ორგანიზაციისა და ავსტრალიური არასამთავრობო ორგანიზაცია Walk Free Foundation-ის ერთობლივ ანგრაშში დიდი ყურადღება დაეთმო იძულებით ქორწინების საკითხს. ორგანიზაციების შეფასებით, იძულებითი ქორწინებები თანამედროვე მონობის ძირითადი ფორმაა.

თემაზე მომუშავე ექსპერტების შეფასებით, 15,4 მილიონ ადამიანს იძულებით ქორწინების პირობებში უწევთ ცხოვრება. ამასთანავე აღნიშნულია, რომ 2012 დან 2016 წლამდე, სულ, იძულებით ქორწინების 6,5 მილიონი შემთხვევა დაფიქსირდა.

აღნიშნული ორგანიზაციების ინფორმაციით, ძალადობის მსხვერპლნი იძულებითი ქორწინების შედეგად კარგავენ სექსუალურ ავტონომიას და პრაქტიკულად, უფასო მუშახელის ფუნქცია იძენენ.

როგორც აღმოჩნდა, იძულებითი ქორწინების მსხვერპლებად კაცებიც გვევლინებიან, თუმცა საკმაოდ მცირე პროცენტით. იძულებით ქორწინებების მხოლოდ 12 პროცენტი წარმოადგენს კაცზე ძალადობას, დანარჩენი 88 პროცენტ შემთხვევებში ძალადობის მსხვერპლი ქალია.

ქალზე განხორციელებული ძალადობის მთელი მოცულობის 37 პროცენტი 18 წლამდე ასაკის გოგონებზე მოდის. არასრულწლოვანი გოგონების 44 პროცენტი, ქორწინების გაფორმების დროისთვის, არ აღემატება 15 წლის ასაკს.

იძულებითი ქორწინების ყველაზე მეტი შემთხვევა აფრიკაში ხდება, განსაკუთრებით კი კონტინენტის არაბულ სახელმწიფოებში. ორგანიზაციების ინფორმაციით, ასეთი შემთხვევების შესახებ ისინი სრულ ინფორმაციას ვერ ფლობენ, თუმცა აფრიკაში იძულებითი ქორწინების დაახლოებით 4,8 შემთხვევა ფიქსირდება ყოველ 100 მოსახლეზე.

ანგარიშში წარმოდგენილი ინფორმაციის თანახმად, მსოფლიოში 25 მილიონი ადამიანი იძულებითი შრომის პირობებში ცხოვრობს. აქედან დაახლოებით 4,1 მილიონ ადამიანს სახელმწიფო ავალდებულებს შრომას. 16 მილიონი ადამიანი კერძო პირებისა თუ კომპანიების მსხვერპლია. დაახლოებით 4,8 მილიონი ადამიანი, რომელთა 99 პროცენტი ქალია, ტრეფიკინგის მსხვერპლია და იძულებითაა ჩართული სექსმომსახურების ინდუსტრიაში.

ორგანიზაციების ინფორმაციით, შრომითი იძულების მსხვერპლებზე ძალადობენ როგორც ფიზიკურად, ისე - ფსიქოლოგიურად. მონურ პირობებში მომუშავე ადამიანების მიერ შექმნილი პროდუქცია ჩვენამდე ხშირად კანონიერი კომერციული არხებით აღწევს. იმ პროდუქციის საკმაოდ დიდი ნაწილი, რასაც ჩვენ ყოველდღიურად მოვიხმართ, სწორედ მონურ პირობებში მომუშავე ადამიანების მიერ არის წარმოებული.

უკანასკნელი ხუთი წლის განმავლობაში, ორგანიზაციის შეფასებით, თანამედროვე მონობა, პირდაპირი თუ ირიბი ფორმით, დაახლოებით 90 მილიონმა ადამიანმა გამოსცადა.