ევროპის სახალხო პარტიამ 2025 წლის 30 აპრილ საქართველოსთან დაკავშირებით რეზოლუცია მიიღო. დოკუმენტში არის მოწოდება "ახალი არჩევნების ჩატარებაზე, პოლიტპატიმრების გათავისუფლებასა და ბიძინა ივანიშვილთან დაკავშირებული ბიზნესების დასანქცირებაზე".

EPP მოითხოვს, რომ ევროკავშირში ბიძინა ივანიშვილის აქტივები გაყინონ, "ქართუ ბანკი" SWIFT-დან და Visa/MasterCard-ის სისტემებიდან გათიშონ.

ამას გარდა, რეზოლუციაში წერია, რომ ევროკავშირმა სექტორული სანქციები დაუწესოს მიზნობრივ ბიზნესს, რომელიც რეჟიმს მხარს უჭერს. რეზოლუცია ასევე მოუწოდებს საერთაშორისო ინსტიტუტებს, არ აღიარონ ქართული ოცნების ერთპარტიული პარლამენტის ან მისი დანიშნული პრეზიდენტის ლეგიტიმურობა და სანაცვლოდ პრეზიდენტი სალომე ზურაბიშვილი აღიარონ ქართველი ხალხის ერთადერთ ლეგიტიმურ წარმომადგენლად.

"EPP მიესალმება ევროკავშირის საბჭოს გადაწყვეტილებას, შეაჩეროს უვიზო მოგზაურობა ქართველი დიპლომატებისთვისა და ოფიციალური პირებისთვის, როგორც პირველ ნაბიჯს — და ხაზს უსვამს, რომ „ქართული ოცნება” სრულიად პასუხისმგებელია საქართველოს მოქალაქეებისთვის უვიზო რეჟიმის შესაძლო შეჩერებასთან დაკავშირებულ შედეგებზე — თუ დემოკრატიულ მმართველობასა და თავისუფლებებზე შესაბამისი პირობები და თავისუფლებები არ იქნება დაკმაყოფილებული...

[EPP] ევროკავშირის ყველა წევრ სახელმწიფოსა და იგივე აზრზე მყოფ ყველა საერთაშორისო პარტნიორს მოუწოდებს, დაუყოვნებლივ შემოიღონ კოორდინირებული ორმხრივი პერსონალური სანქციები ბიძინა ივანიშვილის, მისი ოჯახის წევრების, კომპანიებისა და ხელშემწყობთა ქსელის წინააღმდეგ, და ევროკავშირში არსებული ივანიშვილის ყველა აქტივი გაყინონ; [EPP] ევროპულ საბჭოს მოუწოდებს, შესაბამისი ზომები მიიღონ, რათა ივანიშვილის "ქართუ ბანკი" SWIFT და Visa/MasterCard ქსელებიდან ჩამოჭრან, და სექტორალური სანქციები შემოიღონ ბიზნესების წინააღმდეგ, რომლებიც მხარს უჭერენ რეჟიმს, განსაკუთრებით ისეთებს, რომლებსაც სპილენძის მადნებთან და ფერად მეტალებთან აქვთ საქმე..." — წერია დოკუმენტში (ტვ პირველი თარგმანი).

"საქართველოს საბანკო ასოციაციის" მიერ გავრცელებულ ინფორმაციაში ნათქვამია, რომ საუბარი "ქართუს" SWIFT სისტემიდან გამოთიშვაზე, რეალობას არ შეესაბამება.

"გვსურს, ხაზგასმით აღვნიშნოთ, რომ მოცემული რეზოლუცია წარმოადგენს პოლიტიკური შინაარსის დოკუმენტს და ის არ შეიძლება გახდეს ბანკის მიმართ მოქმედების სამართლებრივი ან რეგულაციური საფუძველი, საუბარი "ქართუს" SWIFT სისტემიდან გამოთიშვაზე არ შეესაბამება რეალობას.

"ქართუ ბანკი" საერთაშორისო საფინანსო სისტემის ნაწილია და იცავს როგორც საქართველოში მოქმედ კანონმდებლობას, ასევე საერთაშორისო რეგულაციებს.

აღნიშნული ფაქტის საფუძველზე პროგნოზების და ინტერპრეტაციების გავრცელებამ ადგილობრივი აქტორების და მედიის მიერ შესაძლოა ხელი შეუშალოს საზოგადოების მიერ რეალური სურათის აღქმას და გამოიწვიოს ბანკის ფინანსური ზიანი", — ნათქვამია განცხადებაში.

EPP-ის რეზოლუციას რუსთავი 2-ის ეთერში საქართველოს ეროვნული ბანკის მოვალეობის შემსრულებელი ნათია თურნავაც გამოეხმაურა. მისი თქმით, SWIFT-ის, როგორც ეფექტური საგადახდო სისტემის პოლიტიკური ზეწოლის იარაღად ქცევა, თავად ამ სისტემას ასუსტებს.

ნათია თურნავა: SWIFT-ის, როგორც ეფექტური საგადახდო სისტემის პოლიტიკური ზეწოლის იარაღად ქცევა, თავად ამ სისტემას ასუსტებს

"ეს ყველაფერი, საბოლოო ჯამში, კონტრპროდუქტიულია და არ აღწევს იმ მიზანს, რისთვისაც თავის დროზე სანქციები იყო მოგონილი და უფრო იწვევს იმედგაცრუებას და გულის წყრომას მოსახლეობაში. განსაკუთრებით, როდესაც უსამართლობის შეგრძნება არის. ჩვენი საბანკო სისტემის, თუნდაც "ქართუ ბანკის" მიმართ, როგორც ერთ-ერთი საბანკო ინსტიტუტის მიმართ ასეთი მოწოდების გაჟღერება, თუნდაც ეს მხოლოდ პოლიტიკის რიტორიკის დონეზე, არის ძალიან უსამართლო. იმიტომ, რომ ჩვენი საბანკო სისტემა არის ერთ-ერთი ყველაზე მოწესრიგებული, მათ შორის, "ქართუ ბანკიც", სადაც ფორმალური პრობლემა არ არსებობს და საყვედური არავის არ ეთქმის. ჩვენი საბანკო სისტემა ყველაფერს იცავს თავიდან ბოლომდე, ჩვენ ამას ვუყურებთ და ვაკვირდებით.

ერთ რაღაცას ვიტყვი, როგორც ცენტრალური ბანკირი და როგორც ეკონომისტი, ასეთი მოხშირებული ხსენება და გამოყენება ამ კონტექსტში SWIFT-ის, როგორც ერთ-ერთი ყველაზე ფართოდ გავრცელებული, ეფექტური საგადახდო სისტემისა, ამის ხსენება, როგორც პოლიტიკური ზეწოლის იარაღის, ანუ ამის იარაღად ქცევა, საბოლოო ჯამში, თვითონ ამ სისტემას — SWIFT-ს ასუსტებს და იწვევს სურვილს სხვადასხვა ქვეყანაში ალტერნატივებზე იფიქრონ," — განაცხადა ნათია თურნავამ.