8 მარტის მოახლოებასთან ერთად, სხვადასხვა კომპანიები ცდილობენ მომხმარებლების აუდიტორიას თავი მოაწონონ ქალებისადმი მიძღვნილი სარეკლამო შეთავაზებებით, ხშირად ეს შეთავაზებები თუ ფასდაკლებები საკმაოდ სექსისტურია და ქალის კონკრეტულ გენდერულ როლს უსვამს ხაზს, მაგალითად “აჩუქე ეს მშვენიერი მტვერსასრუტი მეუღლეს” ან “ტაფების ნაკრები მხოლოდ განსაკუთრებული დიასახლისისთვის” - სწორედ ასეთი რეკლამებია, სადაც ქალის ძირითად როლად შინ საქმიანობა, სამზარეულოში ტრიალი და სახლის დალაგება მოიაზრება.

სექსისტურ რეკლამებს, ისევე, როგორც გენდერულ სტერეოტიპებს და სექსიზმს, ხანრძლივი ისტორია აქვთ და ამ სტატიაში სწორედ ის ძველი რეკლამები შეგიგროვეთ, რომელიც დღეს რომ გვენახა, აუცილებლად შოკში ჩაგვაგდებდა.

1. მამაკაცის ფეხსაცმლის რეკლამა ჟურნალ ფლეიბოიში, 1974 წელი.
“(ქალი) იქ დააბი, სადაც მისი ადგილია”

2. სიგარეტის რეკლამა, 1969 წელი.“შეაბოლე სახეში და ყველგან გამოგყვება”

3. საუზმის ბურღულის რეკლამა 1930-40-იანი წლებიდან, რომელშიც “იმდენი ვიტამინია, რომ ცოლები შეუჩერებლად ალაგებენ სახლს და ამზადებენ საჭმელს”. “რაც უფრო მძიმედ შრომობს ცოლი, უფრო საყვარლად გამოიყურება".

4. ფოლკსვაგენის რეკლამა 1960-იანი წლებიდან, სადაც დამტვრეული მანქანა ხაზს უსვამს, რომ ქალები ცუდი მძღოლები არიან, მანქანის მართვა არ შეუძლიათ და სახლისკენ გზად ყველაფერს დაეჯახებიან. “ადრე თუ გვიან, შენი ცოლი სახლში მაინც მოაღწევს. ეს კი ფოლკსვაგენი ყოლის საუკეთესო მიზეზია”

5. ქალის მიერ მანქანის ცუდად მართვაზე კიდევ ერთი რეკლამა, სადაც ქალი დაჭყეტილი თვალებით არის გამოსახული, ხოლო სლოგანით ვიგებთ, რომ ეს ავტომატური მანქანაა “მარტივად სამართავად”.

6. მამაკაცის ჯემპრის რეკლამა სლოგანით “კაცები ქალებზე უკეთესები არიან”, სადაც რეკლამა გვიხსნის, რომ ვინაიდან ქალის ადგილი სახლშია, გარეთ კი მათი “თრევა” კაცებს უწევთ, ამიტომ სჯობს შეიძინოთ ეს ჯემპრი, რათა ყველგან, შინ და გარეთაც, კარგად გამოიყურებოდეთ.

7. ლუდის რეკლამა, სადაც ქალი აუცილებლად დიასახლისია, თანაც ცუდი, თუმცა, სამზარეულოში რაც არ უნდა გააფუჭოს, ლუდს ხომ მაინც ვერ დაწვავს.

8. სამზარეულოში “ბზრიალის” 1961 წლის რეკლამა Kenwood-ისგან, სადაც კონკრეტული აპარატის ღირსება წარმოჩენილია, რომ ის ყველაფერს აკეთებს, გარდა საჭმლის მომზადებისა, ამისთვის ხომ უკვე არსებობს - ცოლი.

9. Hoover-ის მტვერსასრუტის საშობაო რეკლამა 1950-იანი წლებიდან.
“შობის დილას, ის Hoover-ით გაბედნიერდება”

10. კეტჩუპის ბოთლის ახალი თავსახურის რეკლამა 1953 წელს, სლოგანით:"რას გულისხმობ, ქალსაც კი შეუძლია გახსნას?"

ზოგიერთი ამ რეკლამიდან უკვე თითქმის ერთი საუკუნე გავიდა, მაგრამ, სამწუხაროდ, ქალების ობიექტივიზაცია და გენდერული სტერეოტიპები რეკლამაში ისევ ცოცხალია. ფორმა შეიცვალა, მაგრამ არსი იგივე დარჩა – ქალებს ისევ ხშირად ხედავენ, როგორც ნივთის, სახლის ან მამაკაცის დამატებას. თუმცა, იმედია, დროსთან ერთად ეს საკითხიც უკეთესობისკენ შეიცვლება.