ოსკარზე ნომინირებული პირველი ტრანსგენდერი მსახიობი კარლა სოფია გასკონი კრიტიკის ქარცეცხლში ეხვევა. სკანდალი მას შემდეგ დაიწყო, რაც ინტერნეტსივრცეში ესპანელი ტელევარსკვლავის ძველი პოსტები გავრცელდა.

X-ზე (ყოფილ ტვიტერზე) გამოქვეყნებულ პოსტებში გასკონი საკამათოდ მიჩნეულ შეხედულებებს გამოთქვამს მუსლიმებზე, ჯორჯ ფლოიდსა და ოსკარის ინკლუზიურობაზე. პოსტების უმრავლესობა პლატფორმიდან მალევე გაქრა, მაგრამ სხვადასხვა მედიაში მათი შინაარსი მაინც ვრცელდება. მაგალითად, 2020 წლის ნოემბრით დათარიღებულ პოსტში გასკონი წერს, რომ ესპანეთში "იმაზე მეტი მუსლიმია, ვიდრე ოდესმე ყოფილა".

"ყოველ ჯერზე, როცა ჩემს შვილს სკოლაში ვაკითხავ, წინანდელზე მეტი ქალი მხვდება თავსაბურავით და ქუსლებამდე კაბით შემოსილი. მომავალ წელს ინგლისურის ნაცვლად არაბულს ასწავლიან", — დაწერა მსახიობმა, რომელიც წლევანდელ ოსკარზე ჟაკ ოდიარის ფილმ Emilia Pérez-ში შესრულებული მთავარი როლისთვისაა წარდგენილი.

ისლამთან ერთად, გასკონის ძველი პოსტები შეეხება ჯორჯ ფლოიდსაც, შავკანიან ამერიკელს, რომელიც 2020 წელს პოლიციელის მხრიდან ძალადობას ემსხვერპლა. ფლოიდის მკვლელობას მაშინ აშშ-ში მასობრივი დემონსტრაციები მოჰყვა.

"ვფიქრობ, ძალიან ცოტა ადამიანს ანაღვლებს ჯორჯ ფლოიდი, თაღლითი ნარკომანი, მაგრამ მისმა სიკვდილმა კიდევ ერთხელ აჩვენა, რომ ისევ არსებობს ხალხი, რომელიც შავკანიან ადამიანებს უუფლებო მაიმუნებად თვლის, პოლიციელებს კი — მკვლელებად. ყველანი ცდებიან", — წერდა გასკონი.

ტრანსგენდერი მსახიობი, რომელმაც სულ ახლახან ისტორიული პრეცედენტი შექმნა თავისი წარმატებით, წინათ ოსკარსაც აკრიტიკებდა.

"ოსკარი სულ უფრო და უფრო მეტად ემსგავსება დამოუკიდებელი და საპროტესტო ფილმებისთვის მიძღვნილ ცერემონიას. ვერ ვხვდებოდი, აფრო-კორეულ ფესტივალს ვუყურებდი თუ 'შავკანიანთა სიცოცხლე მნიშვნელოვანია' მოძრაობის დემონსტრაციას", — ასე გამოეხმაურა მსახიობი კინოაკადემიის დაჯილდოებას 2021 წელს.

ისლამოფობიასა და რასიზმში დადანაშაულებული გასკონი ბოლო დღეებში ისეთი მასშტაბური და მწვავე განხილვის თემად იქცა, რომ ნეტფლიქსმა, რომელიც Emilia Pérez-ის უკან დგას, მსახიობისგან დისტანცირება ამჯობინა. გასკონმა კი ბოდიში მოიხადა და აღნიშნა, რომ პოსტების შინაარსი კონტექსტიდან იყო ამოგლეჯილი.

"ჩემთვის, როგორ თავადაც მოწყვლადი ჯგუფის წარმომადგენლისთვის, ეს სირთულეები ძალზედ ნაცნობია და დიდ ბოდიშს ვუხდი ყველას, ვისაც ტკივილი მივაყენე", — აცხადებს მსახიობი, — "მთელი ჩემი ცხოვრება უკეთესი სამყაროსთვის ვიბრძოდი და მჯერა, რომ სინათლე ყოველთვის გაიმარჯვებს ბნელეთზე".

სიტუაციის უკეთ ასახსნელად, ტელევარსკვლავმა ესპანურენოვან CNN-თან ერთსაათიანი ინტერვიუც ჩაწერა, მაგრამ, როგორც ცნობილია, ეს ყველაფერი ფილმის PR-გუნდთან შეუთანხმებლად მოხდა. გამოცემა Variety-ის ცნობით, ნეტფლიქსმა გასკონთან პირდაპირი კომუნიკაციაც შეწყვიტა და მას მხოლოდ აგენტის მეშვეობით ეკონტაქტება; ამასთან, აღარ ანაზღაურებს მსახიობის მგზავრობის ხარჯებს სხვადასხვა ღონისძიებაზე დასასწრებად. ამდენად, გასაკვირი არაა, რომ გასკონმა არაერთი დაჯილდოება გამოტოვა. უცნობია ისიც, დაესწრება თუ არა მსახიობი ოსკარის დაჯილდოების ცერემონიას 2 მარტს. ტელევარსკვლავი, რომელიც წინათ Emilia Pérez-ის პრომომასალაში ფილმის ერთ-ერთი სახე იყო, სარეკლამო პოსტერებზეც ნაკლებად ჩნდება.

ფოტო: Shanna Besson / Page 114 / Why Not Productions / Pathé Films / France 2 Cinéma

Emilia Pérez კი წლევანდელ ოსკარზე ყველაზე მეტ, 13 ნომინაციაშია წარდგენილი. ამერიკული კინოინსტიტუტის მიერ 2024 წლის 10 საუკეთესო ფილმს შორის დასახელებული ნაწარმოები გვიყვება გასკონის პერსონაჟზე, ნარკობარონზე, რომელიც ადვოკატის დახმარებით თავისი სიკვდილის გათამაშებასა და ტრანზიციის გავლას გეგმავს.

ფილმი ოქროს გლობუსის წლევანდელ დაჯილდოებაზეც იყო წარდგენილი 10 ნომინაციაში, საიდანაც ოთხი მოიგო კიდეც.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...