დევიდ ლინჩი მწეველი იყო. კბილებს შორის სულ ამერიკულ სტილში ჰქონდა სიგარეტი გაჩრილი. მისი და სიგარეტის სიყვარული ლინჩის ფილმებშიც გამოიხატებოდა. კვამლი და ცეცხლი მისი ნამუშევრების განუყოფელი ნაწილი იყო. ლინჩისთვის სიგარეტი არ იყო მხოლოდ ჩვევა, ეს უფრო წმინდა რამ იყო. მოწევა რეჟისორისთვის სამყაროს ჩასუნთქვასა და ზღაპრული დიდებულების ამოსუნთქვას ჰგავდა.

ის 1946 წელს დაიბადა — 20 წლით ადრე, ვიდრე ამერიკელი ქირურგები პირველად იტყოდნენ, რომ მოწევა კიბოს იწვევს. ლინჩი იმ დროში გაიზარდა, როცა ამერიკულ გლამურს სიგარეტი და ფილმი ამაგრებდა. იმ დროს მსახიობები, როგორებიცაა ჯოან კროუფორდი და ბეტ დევისი, ვალსს ცეკვავდნენ სიკვდილის კვამლით ხელში. მაშინ სიგარეტი ხელოვანის ცხოვრების განუყოფელ ნაწილად მიიჩნეოდა და საფერფლეში დაგროვილი ნამწვი კარგი სამუშაო დღის მტკიცებულება იყო.

ფოტო: Medium

"მე მოწევასა და ყავის დალევას ყოველთვის ხელოვნებასთან ვაკავშირებდი. ისინი განუყოფლები არიან" — თქვა ლინჩმა 2013 წლის ინტერვიუში. 11 წლის შემდეგ, მის ბოლო ინტერვიუში რეჟისორმა გაამხილა, რომ 2020 წელს დასმულმა ემფიზემის, ფილტვების ქრონიკული დაავადების, დიაგნოზმა აიძულა მის ცხოვრებაში ერთ-ერთი უდიდესი რომანი დაესრულებინა.

ლინჩის ახალგაზრდობის დიდი მწეველები - ბეტ დევისი, კლარკ გეიბლი, ბეტი გრეიბლი — ყველანი მოწევასთან დაკავშირებული სხვადასხვა მიზეზებით გარდაიცვალნენ. მაშინ ამან ბევრს მისცა ბიძგი, მოწევა მავნე ჩვევად გამოეცხადებინათ. ახლა, როცა სიგარეტი ისევ გარომანტიზებულია რეჟისორის გარდაცვალებამ საზოგადოებას გაახსენა, სავალალო შედეგები, რომელსაც მოწევა იწვევს. ის, რომ მანკიერ ჩვევაზე შეყვარებულმა ლინჩმა გაიაზრა და აღიარა, თუ რამდენად ცუდი იყო ჯანმრთელობისთვის მოწევა, რიგ მწეველებს ეხმარება ამერიკაში და მავნე ჩვევისთვის თავის დასანებებლად მოტივაციას აძლევს.