ერთ-ერთ სასტუმროში, სადაც ჯანდაცვის სამინისტროს მიერ ორგანიზებული ღონისძიება უნდა ჩატარებულიყო, მედიის წარმომადგენლები მივიდნენ და იქ მყოფ ჯანდაცვის მინისტრ მიხეილ სარჯველაძეს "ბათუმელებისა" და "ნეტგაზეთს"მზია თანადამფუძნებლისა და დირექტორის ჯანმრთელობის მდგომარეობის შესახებ ჰკითხეს, რომელიც მე-16 დღეა შიმშილობს.

მიხეილ სარჯველაძემ ჟურნალისტებს ამ კითხვაზე არ უპასუხა და თქვა, რომ ჟურნალისტებს პერფორმანსის დადგმა სურთ.

"არ გინდათ ეს იაფფასიანი პოპულიზმი, დაამთავრეთ", — უთხრა სარჯველაძემ ჟურნალისტებს.

"მთის ამბების" დამფუძნებლის, გელა მთივლიშვილის თქმით, ჟურნალისტებს მინისტრისგან სურდათ გაეგოთ როგორია მზია ამაღლობელის ჯანმრთელობის მდგომარეობა, მაგრამ მიხეილ სარჯველაძეს "ერთი სიტყვა ვერ ათქმევინეს დემაგოგობის და მათზე თითის გაშვერის გარდა"

"მზიას ჯანმრთელობას და სიცოცხლეს ემუქრება საფრთხე. ეს კაცი არის ქართული ოცნების ჯანდაცვის მინისტრი და მოვედით ერთადერთი კითხვით — რას აკეთებს მისი უწყება, რომელსაც ძალაუფლება აქვთ, მზიას ჯანმრთელობასთან დაკავშირებით, რომ მისი ჯანმრთელობა და სიცოცხლე იყოს დაცული. ერთი სიტყვა ვერ ვათქმევინეთ დემაგოგობის და ჩვენზე თითის გაშვერის გარდა", – განაცხადა ადგილზე მყოფმა "მთის ამბების" დამფუძნებელმა გელა მთივლიშვილმა.