საქართველოს ექს პრეზიდენტის, მიხეილ სააკაშვილის ძმა, დავით სააკაშვილი უკრაინის სახელმწიფო საემიგრაციო სამსახურში გადაიყვანეს. აღნიშნულს უკრაინული მედიის გარდა ადასტურებს მიხეილ საკაშვილიც.

უკრაინის შინაგან საქმეთა სამინისტროში ამბობენ, რომ დავით სააკაშვილმა ქვეყნის ტერიტორია უნდა დატოვოს, რადგან მას ცხოვრებისა და მუშაობის უფლება ჩამორთმეული აქვს და უკრაინაში უკანონოდ იმყოფება.

უწყებაში ასევე, ამბობენ, რომ ამჟამად ადმინისტრაციული ჯარიმის დაკისრებისა და დავით სააკაშვილის დეპორტირების საკითხე მიმდინარეობს მუშაობა.

მიხეილ სააკაშვილის მტკიცებით, ამ გზით უკრაინის ხელისუფლებას მასზე ზეგავლენის მოხდენა სურს, რომ სააკაშვილმა ქვეყანაში ჩასვლა გადაიფიქროს.

"რა გაეწყობა, შევხვდებით საზღვარზე", - აცხადებს სააკაშვილი.

26 ივლისს ამერიკაში ვიზიტისას მიხეილ სააკაშვილს ორი წლის წინ მიცემული მოქალაქეობა ჩამოართვეს, რაც ნიშნავს იმას, რომ ანულირებულია მისი პასპორტიც. მიუხედავად ამისა, შემდეგ სააკაშვილი პოლონეთსა და ლიტვაში ჩავიდა.

სააკაშვილი უკრაინაში დაბრუნებას 10 სექტემბერს გეგმავს. მისი თქმით, ის უკრაინაში, კერძოდ ლვოვში პოლონეთის ტერიტორიიდან შევა, მასთან ერთად კი საზღვარზე იქნებიან პოლონეთში მცხოვრები უკრაინელები და სხვა პოლიტიკოსები. მისივე თქმით, ის კიევიდან ოდესაშიც გეგმავს დაბრუნებას.

განახლება: მიხეილ სააკაშვილის ძმა უკვე თავისუფალია. ადვოკატის თქმით, კითხვაზე დაკავებულია თუ არა დავით სააკაშვილი, საიმიგრაციო სამხსახურის უფროსმა უპასუხა, რომ არა, რის შემდეგაც სააკაშვილი ადგა და წავიდა.