კალიფორნიაში, ლოს-ანჯელესის ტერიტორიაზე გაჩენილ ხანძარს ათასობით მოქალაქის საცხოვრებელი ემსხვერპლა. ცეცხლის ალი რამდენიმე ყველაზე მჭიდროდ დასახლებულ სამეზობლოს მოედო — ფესიფიქ პალისადს, ჰერსტს, იტონს, ლიდიას და სანსეტს.

ფესიფიქ პალისადში, სანტა მონიკას მთებსა და წყნარ ოკეანეს შორის არსებულ დასახლებაში ხანძარმა დაახლოებით 48 მილიონი m2 მოიცვა და ბევრი ჰოლივუდის ვარსკვლავის სახლს შეეხო. ფესიფიქ პალისადი მომხიბვლელი ხედებისა და დაცულობის გამო განსაკუთრებული პოპულარობით სარგებლობდა ცნობილ ადამიანებში.

ხანძარმა შეიწირა პერის ჰილტონის, ლეიტონ მისტერის, ადამ ბროუდის, ანა ფარისის, ბილი კრისტალისა და სხვა სელებრითების სახლები. ვარსკვლავები კატასტროფულ მოვლენას სოციალურ ქსელში გამოეხმაურნენ.

"სიტყვებით ვერ აღვწერ ჩემს გულისტკენას. ჩემს ოჯახთან ერთად ახალი ამბების ყურებისას მალიბუში მდებარე ჩვენი სახლის დაწვის ცქერა ისეთი რამაა, რაც არავინ უნდა გამოცადოს. ამ სახლში უამრავი ძვირფასი მოგონება შევქმენით. სწორედ აქ აიდგა ფენიქსმა ფეხი და სწორედ აქ ვოცნებობდით ლონდონთან მთელი ცხოვრების განმავლობაში მოგონებების შეგროვებას," — წერს ჰილტონი, ორი შვილის, ფენიქსისა და ლონდონის დედა.

ხანძარს სასწაულებრივად გადაურჩა ჯეიმი ლი კურტისის სახლი. "ჩვენი საყვარელი სამეზობლო აღარ არსებობს. ჩვენი სახლი გადარჩა. უამრავმა სხვამ ყველაფერი დაკარგა. დაეხმარეთ ადამიანებს იქ, სადაც შეძლებთ. მადლობა პირველ გამომხმაურებლებსა და მეხანძრეებს," — წერს მსახიობი ინსტაგრამზე.

ამერიკული მედიის ცნობით, მეხანძრეებმა და უსაფრთხოების სხვა პროფესიონალებმა 70 000-ზე მეტი ადამიანის ევაკუაცია მოახერხეს. ჯერჯერობით უცნობია ხანძრით გამოწვეული ზარალის სრული მასშტაბი.