"მე, როგორც საჯარო სექტორში დასაქმებული პირი, ადიგენის მუნიციპალიტეტის საკრებულოს აპარატის უფროსი,ცალსახად ვემიჯნები 28 ნოემბერს გაკეთებულ განცხადებას", — ამის შესახებ სოციალურ ქსელში ადიგენის მუნიციპალიტეტის საკრებულოს აპარატის უფროსი, მიხეილ ბუცხრიკიძე წერს, რითაც ემიჯნება ქართული ოცნების გადაწყვეტილებას, ევროინტეგრაციის პროცესის დაპაუზებაზე.

ამასთან, იგი აღნიშნავს, რომ გმობს მშვიდობიანი პროტესტი ძალადობრივი ფორმით დარბევას. ბუცხრიკიძე ერთგულებას გამოხატავს კონსტიტუციის 78-ე მუხლის მიმართ, რომელიც მოიაზრებს, რომ "ჩვენი ქვეყნის ადგილი და მომავალი მხოლოდ ევროპაშია".

"მე, როგორც საჯარო სექტორში დასაქმებული პირი, ადიგენის მუნიციპალიტეტის საკრებულოს აპარატის უფროსი,ცალსახად ვემიჯნები 28 ნოემბერს გაკეთებულ განცხადებას და ვგმობ საქართველოს მოქალაქეების მშვიდობიანი პროტესტის ძალადობრივი ფორმით დარბევას. მიმაჩნია,რომ დღევანდელი გეოპოლიტიკური ვითარებიდან გამომდინარე, სასიცოცხლოდ მნიშვნელოვანია ჩვენი ქვეყნის ევროატლანტიკურ სტრუქტურებში გაწევრიანება, რამეთუ ეს არა მხოლოდ ჩვენი სურვილია,არამედ ჩვენი წინაპრების საუკუნოვან მისწრაფებას წარმოადგენს.

ასევე ერთგული ვრჩები საქართველოს კონსტიტუციის 78-ე მუხლის მიმართ,სადაც მკაფიოდ არის ჩანაწერი, რომ ჩვენი ქვეყნის ადგილი და მომავალი მხოლოდ ევროპაშია და ამ გზაზე ,ჩვენ საქართველოს მოქალაქეებმა ყველა ძალისხმევას უნდა მივმართოთ, რომ აღსრულდეს ნება ქართველი ერისა. წინ ევროპისაკენ!", — წერს მიხელ ბუცხრიკიძე.

როგორც მიხეილ ბუცხრიკიძემ ადგილობრივ მედია "სამხრეთის კარიბჭე"-სთან ინტერვიუში განმარტა, მისი პროტესტი გამოიწვია ხელისუფლების მიერ ბოლო პერიოდში გადადგმულმა ნაბიჯებმა.

"ჩემი გულის ამოძახილია ეს პოსტი, დიდი ხანია ვაპირებდი გამომეხატა ჩემი პოზიცია და დღევანდელ დღეს გავაკეთე. აქამდეც ვაფიქსირებდი ჩემს აზრს და უკმაყოფილებას იმ ნაბიჯებზე, რასაც დგამდა და დგამს დღევანდელი ხელისუფლება.

საკრებულოში არსებულ განწყობებზე ვერ ვისაუბრებ, რადგან არ მინდა სხვა საჯარო მოხელეები დავაზიანო, თქვენ იცით, რომ კანონში შეტანილი ცვლილების გამო, ძალიან მოწყვლადი გახდა საჯარო მოხელე.

ვრჩები სამსახურში ჯერჯერობით. ახალი კანონით მეც მემუქრება და სხვა საჯარო მოხელეებსაც შუა რგოლს და ქვედა რგოლს. ჩვენი გათავისუფლება პარტიულ ინტერესზე იქნება დამოკიდებული და არა პროფესიონალიზმზე", — ამბობს მიხეილ ბუცხრიკიძე სამხრეთის კარიბჭესთან საუბრისას.

ცნობისთვის, "ქართული ოცნების" პარლამენტმა გასულ დღეებში საჯარო სამსახურის შესახებ კანონში ცვლილებები შეიტანა.

ცვლილებებს შეგიძლიათ გაეცნოთ სრულად სტატიაში:

რეპრესიები რეორგანიზაციის სახელით — რა იცვლება საჯარო სამსახურის შესახებ საქართველოს კანონში?