"პრემიერს ვუთხარი, რომ ჩვენ გულისყურით გისმენდით და არ გაწყვეტინებდით, [ეს] არ უნდა გადაითარგმნოს იმაში, რომ ყველას გვესმის რას გვიყვებით, ან ყველა ვეთანხმებით”, — ამის შესახებ ტვ იმედის მფლობელმა, ირაკლი რუხაძემ ტვ იმედის ეთერში ოცნების პრემიერ ირაკლი კობახიძესა და ბიზნესის წარმომადგენლებთან შეხვედრაზე საუბრისას განაცხადა. მისი თქმით, მისმა სიტყვამ "ვნებათაღელვა გამოიწვია".

"მე ვიტყოდი, რომ უამრავი ურთიერთპატივისცემა იყო მთავრობის წევრებსა და ბიზნესს შორის. ეს შეუძლებელია არ იყოს, რადგან ჩვენ ვართ ერთ-ერთ წარმოუდგენელი ეკონომიკური აქტიურობისა და დოვლათის შექმნის პერიოდში. ჩვენ რამდენიმე წელი გვქონდა უპრეცედენტო ეკონომიკური ზრდა. იმ ოთახში ვინც იჯდა, ეს სიკეთე თავად იგრძნეს, თავიანთ კომპანიებზე. ამიტომ შეუძლებელი იყო იქ ეს გრძნობა არ ყოფილიყო და ამ სულისკვეთებით მოვიდა ბევრი.

იყო ბევრი, რომელიც დღეს მთავრობას აკრიტიკებს, რადგან მიაჩნია, რომ მთავრობა არასწორ პოზიციაზე დგას და იყო ძალიან ბევრი ადამიანი, რომელსაც მიაჩნია, რომ მთავრობა სწორ მხარეს დგას, რომელსაც რა თქმა უნდა მეც ვეკუთვნი.

მე ვთქვი სიტყვა, რომელმაც გამოიწვია ვნებათაღელვა, მე არანაირი სიტყვის თქმას არ ვაპირებდი, იქ მომივიდა თავში, რომ ეს მეთქვა, ამიტომ შევეცდები გავიმეორო, რა ვთქვი მე იქ. პრემიერმა მოყვა ძალიან გრძლად და დეტალურად ისტორია უკრაინაში ომის დაწყებიდან, სად ვართ დღეს და ამ ისტორიას მე დიდწილად ვეთანხმები და ამას ყველანი გულისყურით ვუსმენდით. რომ მორჩა [საუბარს] და დაიწყეს კითხვები, მე პრემიერს ვუთხარი, რომ ეს ისტორია არის ძალიან რთული და ის, რომ ჩვენ გულისყურით გისმენდით და არ გაწყვეტინებდით, არ უნდა გადაითარგმნოს იმაში, რომ ყველას გვესმის რას გვიყვებით, ან ყველა ვეთანხმებით, რადგან ძალიან ბევრი ნიუანსია. ჩვენ ყველა პატივისცემით გისმენდით, მაგრამ ეს არ ნიშნავს იმას, რომ ამ ოთახში ამას ხალხი ეთანხმება.

მოკლედ რომ მოვყვეთ, არის [ისტორია] შემდეგი: უკრაინაში ომი დაიწყო, საქართველოს სთხოვეს ამ ომში ჩართვა (ზუსტად როგორ და რანაირად უნდა ჩავრთულიყავით ამას სხვადასხვა ინტერპრეტაცია შეიძლება ჰქონდეს). საქართველომ უარი თქვა ომში ჩართვაზე და დიდი სანქციების დაწესებაზე (რა თქმა უნდა ჩვენ გვაქვს რუსეთთან სანქციები დაწესებული, მაგალითად საბანკო და სხვა სფეროებში), მაგრამ საქართველომ უარი თქვა სანქციების დაწესებაზე, რასაც მოჰყვა ძალიან დიდი ტალღა, ცუნამი საქართველოს მთავრობის წინააღმდეგ დასავლეთის ქვეყნებისგან, რომლებიც იმ დროს აწარმოებდნენ ფაქტობრივად ომს რუსეთთან, ეხმარებოდნენ უკრაინას, ძალიან აქტიურად იყვნენ ამაში ჩართულები, ეხმარებოდნენ იარაღით, ფინანსურად და ა.შ. ეს არის დასაწყისი ამ ისტორიის და ამის მერე ფაქტობრივად რაც ხდება, იყო ის, რომ ფართხაფურთხით გვითხრეს, რომ შემოიტანეთ განცხადება ევროკავშირის კანდიდატობაზე.

მანამდე, ომის დაწყებამდე გვეუბნებოდნენ, რომ არ მოხვიდეთ საერთოდ, თქვენ წინ სხვა ქვეყნებია და რამდენიმე წელი არ დაგველაპარაკოთო. ომი რომ დაიწყო და საქართველო "ცუდად მოიქცა", არ გააკეთა რაღაც, რაც მისგან უნდოდათ, უცბად „დაგვაჯილდოვეს“ იმით, რომ, მოდი ახლა სწრაფად განვიხილავთ თქვენი კანდიდატობის განაცხადს. ამას მოჰყვა ის, რომ როგორც ბევრი ელოდა და მათ შორის მეც წარმომედგინა, რომ უნდა დავეჯილდოებინეთ, უარი გვითხრეს [კანდიდატის სტატუსზე]. იმ დროის განმავლობაში მოხდა ორი გადატრიალების მცდელობა საქართველოში", — განაცხადა ირაკლი რუხაძემ.