მედია Reuters-ის ინფორმაციით, აშშ-ის სახელმწიფო მდივანი ენტონი ბლინკენი NATO-ს გენერალურ მდივანს, მარკ რუტეს შეხვდა.

"ევროატლანტიკური და ინდო-წყნარი ოკეანის რეგიონები უფრო და უფრო ერთიანდებიან. ის, რაც უკრაინაში ხდება, მთელ მსოფლიოზე ახდენს გავლენას. ეს ნიშნავს, რომ ჩვენ უნდა შევინარჩუნოთ კურსი, უნდა გავზარდოთ თავდაცვის სფეროში წარმოება, მეტი უნდა გავაკეთოთ თავდაცვის ხარჯების კუთხით. მეტი უნდა გავაკეთოთ იმისათვის, რომ უკრაინამ გაიმარჯვოს", — განაცხადა მარკ რუტემ.

ამასთან, მან ბოლო ოთხი წლის განმავლობაში აშშ-ის სახელმწიფო მდივანს, ენტონი ბლინკენს ლიდერობისთვის მადლობა გადაუხადა.

ცნობისთვის, ენტონი ბლინკენი ბრუსელში გვიან ღამით ჩავიდა, ხოლო დღეს NATO-ს გენერალური მდივნის, მარკ რუტეს გარდა შეხვდება ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, ჯოსეფ ბორელსა და მის შემცვლელს კაია კალასს, დიდი ბრიტანეთის საგარეო საქმეთა მინისტრ დევიდ ლემისა და უკრაინის საგარეო საქმეთა მინისტრ ანდრეი სიბიგას.