უნგრეთის პრემიერ-მინისტრმა ვიქტორ ორბანმა ევროკავშირის ქვეყნებს უკრაინის ომთან დაკავშირებით ახალი სტრატეგიის შემუშავებისკენ მოუწოდა. განცხადება ორბანმა ბიშკეკში, თურქი ხალხების სამიტში მონაწილეობისას გააკეთა.

უნგრეთის პრემიერ-მინისტრი წარსულში არაერთხელ გამოვიდა უკრაინაში ცეცხლის უპირობო შეწყვეტის მოწოდებით და რუსეთის აგრესიის მსხვერპლი ქვეყნის სამხედრო დახმარებას ეწინააღმდეგებოდა.

ევროკავშირის არაერთი ლიდერი ღიად აკრიტიკებს ორბანს, რომელიც ამ ზაფხულს მოსკოვშიც კი ჩავიდა. აშშ-ის არჩევნებში დონალდ ტრამპის გამარჯვებამ ევროპაში ორბანის პოლიტიკურ წონას, სავარაუდოდ, გაზრდის.

ხუთშაბათს ბუდაპეშტში ევროკავშირის არაფორმალური სამიტი გაიმართება, რომელზეც ლიდერები ასევე განიხილავენ ტრანსატლანტიკური ურთიერთობების მომავალს ტრამპის გამარჯვების შემდეგ. იქვე გაიმართება ევროპის პოლიტიკური გაერთიანების ლიდერების შეხვედრაც - მასში შედის ევროპის თითქმის ყველა ქვეყანა გარდა რუსეთისა და ბელარუსისა.