პრეზიდენტმა სალომე ზურაბიშვილმა ჟურნალისტების კითხვას, თუ რას ეტყოდა მმართველ პარტიას იმაზე, რომ ისინი ხელახლა იწყებენ მისი იმპიჩმენტის პროცედურას, მხოლოდ ერთი სიტყვით უპასუხა.

"არაფერს", — განაცხადა პრეზიდენტმა

დღეს, 7 ოქტომბერს, პარლამენტის თავმჯდომარე შალვა პაპუაშვილმა გამოაცხადა, რომ სალომე ზურაბიშვილის იმპიჩმენტი დღის წესრიგში ხელახლა დგება. მიზეზად პაპუაშვილმა პრეზიდენტის უნებართვო საგარეო ვიზიტები დაასახელა.

ქართულმა ოცნებამ პრეზიდენტის იმპიჩმენტის პროცედურა 2023 წელსაც დაიწყო. მიზეზი ამ შემთხვევაშიც იდენტური იყო.

იმავე წლის 16 ოქტომბერს საკონსტიტუციო სასამართლომ სალომე ზურაბიშვილი კონსტიტუციის დამრღვევად ცნო და იმპიჩმენტზე მმართველი გუნდის მოთხოვნა დააკმაყოფილა. მიუხედავად ამისა, ქართულმა ოცნებამ პრეზიდენტის გადაყენება ვერ შეძლო, რადგან იმპიჩმენტის სასარგებლოდ ხმა 86 დეპუტატმა მისცა, საჭირო კი 100 დეპუტატის ხმა იყო.