14 აგვისტოს, სოციალური სამართლიანობის ცენტრმა განცხადება გაავრცელა, რომელშიც საქართველოს მთავრობას, დეზერტირების "ისტორიული" ბაზრის დახურვის გადაწყვეტილების გაუქმების შესახებ მოუწოდებს.

განცხადებაში წერია, რომ მშრომელების ყოველდღიური შემოსავალი და ოჯახების ფიზიკური გადარჩენა სწორედ დეზერტირების ბაზარში ყოველდღიურ შრომას უკავშირდება.

ბაზaრში ათასობით თვითდასაქმებული ადამიანი, მათ შორის გარემოვაჭრე გლეხები, გადამზიდველები, წვრილი ვაჭრები და ინდ მეწარმეები, ტერიტორიის დახურვის შემთხვევაში, შემოსავლის გარეშე რჩებიან.

განცხადებაში ხაზგასმითაა აღნიშნული, რომ დასაქმებულების უმრავლესობა ქალია, მათ შორის არიან სოციალურად დაუცველები, მარტოხელა დედები, იძულებით გადაადგილებული პირები, ეთნიკური უმცირესობები და შრომითი მიგრანტები.

"ჩვენ ვუერთდებით, ისტორიული ბაზრის მშრომელების მთავარ მოთხოვნას და მოვუწოდებთ თბილისის მერიას შექმნას ამ ტერიტორიაზე მუნიციპალური ბაზრის განვითარების სტრატეგია და სამოქმედო გეგმა. მნიშვნელოვანია თბილისის მერიამ ამ პროცესში ჩართოს მშრომელები და სხვა დაინტერესებული პროფესიული, თუ სამოქალაქო გაერთიანებები", — წერს, სოციალური სამართლიანობის ცენტრი.

ცნობისთვის, დეზერტირების ბაზარი, დაგეგმილი მშენებლობის გამო, 6 თვით იკეტება. ბაზრის ტერიტორიაზე ორსართულიანი სავაჭრო ცენტრის აშენების ნებართვა უკვე გაცემულია.

მოვაჭრეები შემოსავლის გარეშე დარჩენის საფრთხის წინაშე დადგნენ, რის გამოც 30 ივლისს პროტესტი გამართეს და თბილისის მერთან, კახა კალაძესთან შეხვედრა ითხოვეს.