შინაგან საქმეთა სამინისტროსა და საქართველოს მთავარი პროკურატურის თანამშრომლებმა, ერთობლივად ჩატარებული ოპერატიულ-საგამოძიებო მოქმედებების შედეგად, ქურდული სამყაროს წევრობის ბრალდებით, 1974 წელს დაბადებული გ.რ. და 1974 წელს დაბადებული ტ.მ. თბილისში, ხოლო 1969 წელს დაბადებული დ.მ. რუსთავში დააკავეს.

გამოძიების ინფორმაციით, ბრალდებულები ე.წ. ქურდულ სამყაროს აღიარებენ. ისინი, „ქურდულ სამყაროში“ დადგენილი სპეციალური წესების შესაბამისად, მონაწილეობას იღებდნენ „ქურდულ გარჩევებში“ და აქტიური კავშირი ჰქონდათ უცხოეთში მყოფ „ქურდული სამყაროს“ წევრებთან.

გამოძიებით ასევე დადგინდა, რომ ბრალდებულებმა, უცხოეთში მყოფი ე.წ. „კანონიერი ქურდის“ დავალებით, რუსთავში მცხოვრებ ერთ-ერთ მოქალაქეს თანხა გამოსძალეს.

შსს-ს ცნობით, სამართალდამცველებმა ნივთმტკიცების სახით 3 500 ლარი ამოიღეს.

გამოძიება ქურდული სამყაროს წევრობის ბრალდებით მიმდინარეობს, საქართველოს სსკ-ს 223-ე პრიმა მუხლის 1-ლი ნაწილით.