კულტურის მინისტრის მოვალეობას მიხეილ კიკნაძე შეასრულებს, რომელიც კულტურის მინისტრის პირველ მოადგილედ დაინიშნა. ამის შესახებ ინფორმაცია bm.ge-მ გაავრცელა.

News.On.ge კულტურის სამინისტროს საზოგადოებასთან ურთიერთობის სამსახურს დაუკავშირდა, სადაც გვითხრეს, რომ "მოგვიანებით დაგვიბრუნდებიან".

უკვე ყოფილი კულტურის მინისტრის, თინათინ რუხაძის გადადგომის შემდეგ, პოსტი დატოვა მინისტრის პირველმა მოადგილემ მაკა გურგენიძემაც. დანარჩენი ორი მოადგილე — გიორგი მირცხულავა და გიორგი ცერცვაძე კი, პოსტებზე რჩებიან. კულტურის სამინისტროს ვებგვერდზე მაკა გურგენიძე მინისტრის მოადგილედ უკვე აღარ იძებნება, ისევე როგორც თინათინ რუხაძე. მინისტრის მოვალეობის შემსრულებლის შესახებ ინფორმაცია ჯერ არ განახლებულა.

ვინ არის მიხეილ კიკნაძე?

მიხეილ კიკნაძის მიერ შევსებული 2025 წლის დეკლარაციის მიხედვით, ის ამ დრომდე კულტურის სამინისტროში შიდა აუდიტისა და მონიტორინგის დეპარტამენტის უფროსია.

სამინისტროში მისვლამდე 2024 წლის იანვრიდან 2024 წლის ნოემბრამდე საქართველოს რკინიგზაში ანალიზისა და მონიტორინგის დეპარტამენტის უფროსი იყო, სადაც 10 თვეში 45 575 ლარი მიიღო ხელფასის სახით; 2024 წელს 2 თვით დასაქმებული იყო შპს "ჯიარ ტრანზიტ ლაინში" შიდა მონიტორინგის მენეჯერად.

შეგახსენებთ, რომ თინათინ რუხაძემ კულტურის მინისტრობიდან გადადგომის შესახებ სოციალურ ქსელში დაწერა და მიზეზად ჯანმრთელობის მდგომარეობა დაასახელა.