ჰარი პოტერის მსახიობმა გარი ოლდმანმა განაცხადა, რომ მისი აზრით, ახალი სერიალი უფრო სასიამოვნო სანახავი იქნება მაყურებლებისთვის, ვიდრე ფილმები.

ოლდმანმა, რომელიც ფილმებში ყველასთვის საყვარელ პერსონაჟს, სირიუს ბლექს თამაშობდა, ახალ სერიალს მხარდაჭერა გამოუცხადა და აღნიშნა, რომ ფილმების შექმნისას წიგნების დიდი ნაწილი ეკრანს მიღმა დარჩა: "ბევრი რამის ამოჭრა მოგვიწია და ამის მიუხედავად, ფილმები მაინც 3-საათიანი გამოდიოდა".

ფოტო: Warner Bros.

მსახიობმა დაამატა: "მჯერა, რომ სერიალში სიუჟეტს თითქმის სიტყვასიტყვით მიჰყვებიან, რაც, ჩემი აზრით, მაყურებლისთვის ბევრად უფრო სასიამოვნო სანახავი იქნება".

ჰარი პოტერის სამყაროში გარი ოლდმანის დებიუტი 2004 წელს, მესამე ფილმში — ჰარი პოტერი და აზკაბანის ტყვე შედგა. მსახიობმა აღნიშნა, რომ ფილმებში ტექნიკური მიზეზების გამო პერსონაჟთა შესახებ ბევრი დეტალი გამორჩენილია — მათ შორის სირიუს ბლექის შესახებაც. მაგალითად, ეკრანიზაციაში ბოლომდე არ აუხსნიათ, რომ მარაუდერთა რუკა სწორედ მან, ჯეიმს პოტერმა, პიტერ პეტიგრიუმ და რემუს ლუპინმა შექმნეს. ასევე, არ ჩანს სირიუსის დევნილად ცხოვრების დიდი მონაკვეთები.

ფოტო: Warner Bros.

HBO-ს ჯერ არ გამოუცხადებია, ვინ შეასრულებს ბლექის როლს ჰარი პოტერის სერიალში. პერსონაჟის გამოჩენას შოუში ისევ მესამე ნაწილიდან ელიან.

დადასტურებულია, რომ ფილმებიდან უორუიკ დევისი — პროფესორ ფლიტვიკის მსახიობი სერიალშიც დაბრუნდება.

1-ელი სეზონის პრემიერა 25 დეკემბერს, HBO Max-ზე იგეგმება.