რა ხდება: პარლამენტმა საგადასახადო კოდექსში ცვლილების შეტანას, რომელიც ოფშორიდან აქტივების გადმომტანის დაბეგვრისგან გათავისუფლებასაც ითვალისწინებს, მხარი დაუჭირა.

დეტალები: კანონპროექტი პარლამენტმა დაჩქარებული წესით განიხილა და დაამტკიცა.

  • ოპოზიცია ამბობს, რომ კანონპროექტში გაწერილი პირობები მიესადაგება კონკრეტულად ბიძინა ივანიშვილს.

დღეს, პლენარულ სხდომაზე, კანონპროექტს მხარი დაუჭირა 73-მა დეპუტატმა, წინააღმდეგი იყო 9.

  • ამავე პროექტით განისაზღვრება, რომ ოფშორში რეგისტრირებული უცხოური საწარმოს ყველა აქტივზე (მათ შორის, წილზე ან აქციაზე) საკუთრების უფლების, 2028 წლის 1 იანვრამდე საქართველოს საწარმოსთვის გადაცემისას, ამ ოპერაციის ფარგლებში, ოფშორში რეგისტრირებული უცხოური საწარმოს და პარტნიორი ფიზიკური პირის მიერ მიღებული შემოსავალი, გათავისუფლებულია მოგების/საშემოსავლო გადასახადისგან.

ოპოზიციას მიაჩნია, რომ ეს კანონი ბიძინა ივანიშვილის შესაძლო სანქცირებასთან არის დაკავშირებული.

კანონპროექტი ხელმოწერისთვის პრეზიდენტს გადაეგზავნება. იმ შემთხვევაში თუ სალომე ზურაბიშვილი მას ვეტოს დაადებს და "ოცნების" უმრავლესობა ამ ვეტოს დაძლევს, დოკუმენტი პარლამენტის თავმჯდომარის, შალვა პაპუაშვილის ხელმოწერით შევა ძალაში.