მოკლედ: ანრი ოხანაშვილმა, პარლამენტის იურიდიულ საკითხთა კომიტეტის თავმჯდომარემ, რუსული კანონის საკომიტეტო განხილვისას დარბაზი დაატოვებინა ოპოზიციონერ დეპუტატებს — თამარ კორძაიასა და ანა ნაცვლიშვილს.

  • ამას წინ უძღოდა სიტყვიერი დაპირისპირება ოპოზიციისა და საპარლამენტო უმრავლესობის წევრებს შორის.

რა ხდება დღეს: რუსული კანონის განხილვისას, კომიტეტის სხდომა ხმაურითა და ფიზიკური დაპირისპირებით მიმდინარეობს — მას შემდეგ, რაც პარტია მოქალაქეების ლიდერმა, ალეკო ელისაშვილმა საპარლამენტო უმრავლესობის ლიდერსა და რუსული კანონის წარმდგენს, მამუკა მდინარაძეს დაარტყა, ალეკო ელისაშვილს ქართული ოცნების რამდენიმე დეპუტატი ფიზიკურად, ჯგუფურად გაუსწორდა.

განხილვა პოლიტიკური ცენზურით: იურიდიული კომიტეტის თავმჯდომარემ ანრი ოხანაშვილმა მიკროფონი გაუთიშა პარლამენტის ოპოზიციონერ დეპუტატს, ხატია დეკანოიძეს, მხოლოდ იმის გამო, რომ საპარლამენტო განხილვისას მან გამოიყენა ფრაზა — რუსული კანონი.

საგულისხმოა, რომ ამავე მიზეზით — საკანონმდებლო ინიციატივის რუსულ კანონად სახელდების გამო, პარლამენტის პლენარული სხდომათა დარბაზი დაატოვებინა შალვა პაპუაშვილმა ალეკო ელისაშვილს 3 აპრილს.

  • გარდა ამისა, ანრი ოხანაშვილმა დღის ბოლოს დარბაზი დაატოვებინა დეპუტატებს: ხაბეიშვილს, ვაშაძეს, მანჯგალაძესა და დეკანოიძეს.