სომხეთის მნიშვნელოვანი სამოქალაქო საზოგადოებრივი ორგანიზაციების ჯგუფმა გაავრცელა განცხადება, რომელშიც გამოხატა "მტკიცე სოლიდარობა“ ქართველი კოლეგების მიმართ, მას შემდეგ, რაც საქართველოს ხელისუფლებამ კვლავ დააბრუნა დღის წესრიგში საკამათო კანონპროექტი, რომელიც მიმართულია სამოქალაქო საზოგადოების ორგანიზაციებისა და მედიის წინააღმდეგ.

პარასკევს, 5 აპრილს, 20-ზე მეტმა ორგანიზაციამ და პირმა მოაწერა ხელი განცხადებას, რომელშიც ნათქვამია, რომ "უცხოური გავლენის“ კონცეფცია ასოცირდება "შეთქმულების თეორიებთან, რომელიც გამოიყენება ადამიანის უფლებების დარღვევისთვის და უდანაშაულოების დევნისთვის“, როგორც სომხეთში, ასევე საქართველოში.

"ჩვენ მხარს ვუჭერთ თქვენს გამბედაობას, დაუპირისპირდეთ საქართველოს მთავრობის თანმიმდევრულ და მუდმივ ძალისხმევას, შეზღუდოს სამოქალაქო თავისუფლებები და ადამიანის ფუნდამენტური უფლებები, მათ შორის, ქალთა პოლიტიკური მონაწილეობის შეზღუდვის სახით, ასევე, გამჭვირვალობის შესახებ კანონპროექტის ხელახალი შემოტანით”, — ნათქვამია განცხადებაში.

ავტორებმა, ასევე, აღნიშნეს, რომ მნიშვნელოვანია "პროდემოკრატიული ძალების" გაერთიანება და წინააღმდეგობის გაწევა რეგიონში დემოკრატიის შესუსტების მცდელობებისთვის.

”ჩვენ ვიცით, რომ თავისუფლება ღრმად და არსებითად არის ფესვგადგმული ჩვენს საზოგადოებებში და ისტორიის ყველაზე ბნელ დროსაც კი, ამისთვის ბრძოლა არასოდეს ყოფილა შესუსტებული”, — წერია განცხადებაში.

განცხადების ერთ-ერთმა ხელმომწერმა, საჯარო ჟურნალისტიკის კლუბის პრეზიდენტმა სედა მურადიანმა განუცხადა OC Media-ს, რომ ასეთი მოვლენები საშიშია და საფრთხეს უქმნის დემოკრატიას რეგიონში, რომელიც ორივე ქვეყანაში დაუცველია.

"ვფიქრობ, მნიშვნელოვანი იყო სოლიდარობის გამოცხადება საქართველოს სამოქალაქო საზოგადოების მიმართ ამ სიტუაციაში, რათა მათ თავი მარტოდ არ იგრძნონ რეგიონში“, — განაცხადა მურადიანმა. "ნაკლებად სავარაუდოა, რომ მათ სხვა მეზობელი ქვეყნების მხარდაჭერა მიიღონ, რადგან ამ მხრივ, რეგიონის სხვა ქვეყნებში, სიტუაცია კიდევ უფრო მძიმეა."

"ჩვენს პოლიტიკურ საზოგადოებებს შორის მრავალი წელია, ძალიან ძლიერი კავშირებია“, — თქვა იზაბელა სარგსიანმა, რომელიც განცხადებას შეუერთდა. მან OC Media-ს განუცხადა, რომ როდესაც 2020 წელს მთიანი ყარაბაღის მეორე ომი დაიწყო, ქართველებისა და აფხაზების ჯგუფმა გაავრცელა ერთობლივი განცხადება, სადაც ომის შეწყვეტის აუცილებლობაზე იყო საუბარი.

მან, ასევე, თქვა, რომ 2008 წელს ერევანში საპრეზიდენტო არჩევნების შემდეგ, საპროტესტო აქციების დროს, მან მიიღო პირდაპირი მხარდაჭერა ქართველი კოლეგებისგან.

"მაშინ ჩემმა ქართველმა კოლეგებმა და მეგობრებმა, ჩვენი კარვისთვის, ყვავილები გამოგვიგზავნეს. ისინი ყოველთვის გვიჭერდნენ მხარს", — თქვა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.