რა ხდება: ხელისუფლების მაღალჩინოსნები განაგრძობენ მადლიერების საჯაროდ გამოხატვას ბიძინა ივანიშვილის მიმართ, რომელიც 2023 წლის 30 დეკემბრიდან მმართველი პარტიის, ქართული ოცნების საპატიო თავმჯდომარეა.

  • ამჯერად, ივანიშვილის მიმართ მადლიერების სერიას თეა წულუკიანი შეუერთდა. ის არის კულტურის მინისტრი და ვიცე-პრემიერი.

დეტალები: წულუკიანმა, ივანიშვილს მადლობა გადაუხადა ქართული ოცნების ქალთა ორგანიზაციის კონფერენციაზე სიტყვით გამოსვლისას.

  • კულტურის მინისტრი აცხადებს, რომ დღეს კვლავ ბრძოლის რეჟიმში არიან და იცავენ თავს, მშვიდობასა და სტაბილურობას:
  • "მადლობა ღმერთს, ჩვენ ეს ყველამ ერთად შევძელით და მადლობა იმ ერთადერთ ადამიანს, რომელიც არის მშვიდობის და სტაბილურობის გარანტი ამ ქვეყანაში, უკვე მერამდენე წელია, ბატონ ბიძინა ივანიშვილს", — თქვა მან.

კონტექსტი: ბიძინა ივანიშვილს ხშირად უხდიან მადლობას, როგორც საქართველოს ხელისუფლების ოფიციალური პირები, ასევე, მმართველი პარტიის საპარლამენტო შემადგენლობა თუ ხელისუფლებასთან დაკავშირებული ექსპერტები, და ცდილობენ, ივანიშვილის სახელს დაუკავშირონ "სტაბილურობა და მშვიდობა."

  • ბიძინა ივანიშვილის მიმართ, მადლიერების საჯაროდ გამოხატვის თვალსაზრისით, განსაკუთრებით გამორჩეული იყო საქართველოს ყოფილი პრემიერ-მინისტრი, ირაკლი ღარიბაშვილი: "უდიდესი მიღწევებისთვის მადლობა ბიძინა ივანიშვილს, მის მიერ ინიცირებული სახალხო გამარჯვების გარეშე ქვეყანა დღეს ომში იქნებოდა გახვეული", — თქვა მან 1-ელ თებერვალს გამართულ პარტიულ ყრილობაზე, როდესაც ივანიშვილმა გადაწყვიტა, რომ პრემიერის პოსტზე ირაკლი ღარიბაშვილი ირაკლი კობახიძით ჩაენაცვლებინა.
ირაკლი ღარიბაშვილი, ბიძინა ივანიშვილი

ირაკლი ღარიბაშვილი, ბიძინა ივანიშვილი

ფოტო: ბიძინა ივანიშვილი და ირაკლი ღარიბაშვილი პარტია "ქართული ოცნების" ყრილობაზე, 2024 წლის 1-ელი თებერვალი

  • 2024 წლის 8 თებერვალს ქართული ოცნების დეპუტატმა, ბექა ოდიშარიამ, ივანიშვილს საჯაროდ გადაუხადა მადლობა იმისთვის, რომ პრემიერ-მინისტრად ირაკლი კობახიძე წარადგინა.
  • ივანიშვილის მიმართ მადლიერებას აცხადებს მოქმედი პრემიერ-მინისტრი, ირაკლი კობახიძეც — გასული წლის დეკემბერში, ივანიშვილის პოლიტიკაში მეოთხედ ფორმალური შემობრუნებისას, თქვა: "მადლობა უნდა გადავუხადოთ ბიძინა ივანიშვილს ამ გადაწყვეტილებისთვის. ეს არის ის მადლობა, რომელსაც იზიარებს პარტიის ყველა წევრი და მხარდამჭერი."
  • 29 მარტს, კობახიძემ, ასევე, აღნიშნა, რომ აქვს "რეგულარული კომუნიკაცია ბატონ ბიძინა ივანიშვილთან."
  • მადლიერების საჯაროდ დადასტურებასთან ერთად, ბიძინა ივანიშვილს ექვთიმე თაყაიშვილს ადარებდა განათლების ყოფილი მინისტრი, მიხეილ ჩხენკელი. ის მიიჩნევდა, რომ "ივანიშვილი თანამედროვე ისტორიაში ღირსეულად უნდა იყოს წარმოჩენილი, ასეც იქნება."