რა ხდება: საქართველოს საფეხბურთო ეროვნულმა ნაკრებმა, ჩემპიონატის შესარჩევი ეტაპის საპლეიოფო ფინალში, საბერძნეთს მოუგო.

მატჩს უდიდესი ღირებულება ჰქონდა — გამარჯვებული ევრო 2024-ზე ითამაშებდა.

დეტალები: ანგარიშის ბედი პენალტების სერიაში გადაწყდა.

  • გიორგი მამარდაშვილმა ერთი ბურთი მოიგერია, ერთი ბერძნებმა ააცილეს კარს.
  • საბოლოოდ კი თამაში 4:2, საქართველოს მოგებით დასრულდა.

"გულშემატკივრების დიდი დამსახურებაა, დღეს რომ აქ ვართ და მიხარია, რომ ისინი გავაბედნიერეთ. თამაში ძალიან რთული იყო, ვიცოდით, რომ ფინალი იყო და ფინალი სულ დაძაბულია, არ იცი რა მოხდება და დიდ პასუხისმგებლობას გრძნობ... ემოციური თამაში იყო, იმიტომ, რომ გვინდოდა, ხალხი გაგვეხარებინა, ისინი იმსახურებენ ამას და გავედით ევროპის ჩემპიონატზე. ჩვენ დავწერეთ ისტორია,“ — თქვა ეროვნული ნაკრების მეკარემ, გიორგი მამარდაშვილმა.

  • გულშემატკივრებს მადლობა გადაუხადა ეროვნული ნაკრების ნახევარმცველმაც, ხვიჩა კვარაცხელიამ:

"ზოგს არ სჯეროდა ჩვენი. არა უშავს, ახლა დაიჯერებენ. უბედნიერესები ვართ, ასეთი ემოცია არასდროს არ მქონია ცხოვრებაში! მადლობა ქართველ გულშემატკივარს, 120 წუთი, ასეთი გულშემატკივრობა არსად მინახავს, ბევრ სტადიონზე მაქვს ნათამაშები, მაგრამ ასეთი რამ არ მინახავს. თქვენ იყავით ერთ-ერთი ყველაზე მნიშვნელოვანი ფაქტორი, რომ დღეს ჩვენ გავიმარჯვეთ!"

  • მოგების აღსანიშნავი ზეიმი, დედაქალაქის და ქვეყნის მასშტაბით, დილამდე გაგრძელდა. მოსახლეობა დროშებით, სიმღერებით, შეძახილებითა და მანქანების სიგნალებით აღნიშნავდა ევრო 2024-ზე საქართველოს ნაკრების გასვლას.
  • მატჩის დასრულების შემდეგ, ნაკრების ფეხბურთელები რესპუბლიკის მოედანზე მივიდნენ, სადაც მოსახლეობა თამაშს, მანამდე, დიდ ეკრანზე უყურებდა.

ბოლო ხაზი: საქართველოს ეროვნული ნაკრები ევროპის ჩემპიონატზე პირველ თამაშს 18 ივნისს, დორტმუნდში გამართავს, სადაც თურქეთის ნაკრებს დაუპირისპირდება.