თბილისის საქალაქო სასამართლომ გამამტყუნებელი განაჩენი დაადგინა ე.წ ფოტოგრაფების საქმეზე ბრალდებულების ალექსანდრე მუხაძისა და დავით დევნოზაშვილის მიმართ.

მოსამართლემ ბრალდებულ დავით დევნოზაშვილს განუსაზღვრა თავისუფლების აღკვეთა ოთხი წლითა და ექვსი თვის ვადით, ხოლო ალექსანდრე მუხაძეს ერთი წლითა და ექვსი თვის ვადით. მათვე ერთი წლისა და ექვსი თვის ვადით ჩამოერთვათ საჯარო სამსახურში თანამდებობის დაკავების უფლება.

კერძოდ, დავით დევნოზაშვილი დამნაშავედ სცნეს სამსახურებრივი უფლებამოსილების გადამეტებაში, ჩადენილი ძალადობით და დაზარალებულის პირადი ღირსების შეურაცხყოფით, რამაც ფიზიკური პირისა უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

ასევე, ალექსანდრე მუხაძე გამტყუნდა სამსახურებრივი უფლებამოსილების გადამეტებისათვის, რამაც ფიზიკური პირის უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

საქმეში არსებულ მტკიცებულებათა ერთობლიობით, სასამართლომ დადგენილად მიიჩნია, რომ 2011 წელს ძალოვანი უწყებების ყოფილი მაღალჩინოსნების მხრიდან სამსახურებრივი უფლებამოსილების გადამეტება.

კერძოდ, ბრალდების მხარის მტკიცებით, დავით დევნოზაშვილმა, რომელიც იმ პერიოდში იკავებდა შსს კონტრდაზვერვის დეპარტამენტის უფროსის მოადგილის თანამდებობას, სასჯელაღსრულების N8 დაწესებულების დირექტორის ალექსანდრე მუხაძის ხელშეწყობით, არაოფიციალურად ცალ-ცალკე შეხვდა ე.წ. ფოტოგრაფების საქმეზე დაკავებულ პირებს.

საქმის მასალების თანახმად, დევნოზაშვილმა დაკავებულების ფსიქოლოგიური ზეწოლისა და დაშინების გზით მოიპოვა წინასწარ შეთხზული ცრუ აღიარებითი ჩვენებები, ჯაშუშურ ქსელში მონაწილეობის შესახებ.