რა ხდება: რამდენიმე წუთის წინ, მოსკოვში ალექსეი ნავალნი დაკრძალეს.

  • ციხეში გარდაცვლილი ოპოზიციონერი პოლიტიკოსის ცხედარი სასაფლაოზე ეკლესიიდან გადაასვენეს.

დეტალები: ეკლესიაში ნავალნისთვის პატივის მისაგებად მოქალაქეები რიგში იდგნენ.

  • როგორც მედუზა წერს, რიგი, დაახლოებით, 700 მეტრი სიგრძის იყო.
  • დაკრძალვის ცერემონიალზე იმყოფებოდნენ აშშ-ის, გერმანიის, საფრანგეთის ელჩები, ასევე სხვა ქვეყნების წარმომადგენლები.

ფოტო: Reuters / Scanpix / LETA

  • ნოვაია გაზეტას კორესპონდენტის ინფორმაციით, ეკლესიაში 300-მდე ადამიანი შეუშვეს, რიტუალი კი "შეძლებისდაგვარად სწრაფად დაასრულეს".

რა თქვეს კრემლში: პუტინის პრესსპიკერმა, დმიტრი პესკოვმა ჟურნალისტებს უთხრა, რომ "კრემლს ნავალნის ახლობლებისთვის, მისი დაკრძალვის დღეს არაფერი აქვს სათქმელი" და განაცხადა, რომ პუტინის ადმინისტრაცია "ვერ შეაფასებს ნავალნის, როგორც პოლიტიკურ ფიგურას“, მაგრამ პესკოვმა ასევე თქვა, რომ ნებისმიერი დემონსტრანტი "აგებს პასუხს კანონის შესაბამისად“.

  • დაკრძალვამდე, საგანმანათლებლო უწყებების ოფიციალურმა წარმომადგენლებმა, მთელი ქვეყნის მასშტაბით გაავრცელეს პროპაგანდისტული ფილმი სოციალურ მედიაში, რომელიც მიმართული იყო ახალგაზრდებისთვის და განმარტებული იყო უნებართვო საჯარო შეკრებებზე დასწრების მძიმე სამართლებრივი შედეგები.