რა ხდება: ესპანეთში, ქალაქ ვალენსიაში, საცხოვრებელ კორპუსებში გაჩენილი ხანძრის შედეგად, სულ მცირე 4 ადამიანი დაიღუპა.

  • 15-მდე ადამიანს ამ დრომდე ეძებენ.

დეტალები: ხანძარი 14-სართულიან სახლში გაჩნდა და გვერდზე მდებარე სახლზეც გადავიდა.

  • მეხანძრეებს მცხოვრებლები, ამწეების საშუალებით, აივნებიდან გადმოჰყავდათ.
  • ექსპერტების თქმით, სახლები მოპირკეთებული იყო ადვილად აალებადი მასალით და ამან ცეცხლს სწრაფად გავრცელების საშუალება მისცა.
  • კორპუსში 138 სახლია, შენობაში 450 ადამიანი ცხოვრობს.
  • დაშავდა 15 პირი, მათ შორის — 6 მეხანძრე და ერთი პატარა ბავშვი, მათ სიცოცხლეს საფრთხე არ ემუქრება.
  • ვალენსიას მერის, მარია ხოსე კატალას თქმით, 9-დან 15-მდე ადამიანის პოვნას ცდილობენ, მთავრობის რეგიონული წევრების ინფორმაციით კი, დაკარგულია 14 ადამიანი.
  • ხანძარს 20-ზე მეტი სახანძრო ეკიპაჟი ებრძოდა, ცეცხლი კიდევ უფრო გააძლიერა ქარმა.
ადგილზე მობილიზებულია სასწრაფო და სამაშველო სამსახურები

ადგილზე მობილიზებულია სასწრაფო და სამაშველო სამსახურები

ფოტო: Reuters

შემთხვევის გამო, კითხვები გაჩნდა შენობის მასალის შესახებ. ეს სახლი 2008-2009 წლებში აშენდა.

  • ესთერ პუჩადესმა, ვალენსიის სამრეწველო ტექნიკური ინჟინრების კოლეჯის ვიცე-პრეზიდენტმა, განუცხადა ესპანურ საინფორმაციო სააგენტო Efe-ს, რომ მას დათვალიერებული ჰქონდა შენობა.
  • მისი თქმით, ექსტერიერზე გამოყენებული იყო პოლიურეთანის მასალა, რომელიც ფართოდ აღარ გამოიყენება აალების რისკის გამო. ამასთან, მას ჰქონდა ალუმინის საფარი.
  • ”მიზეზი, რის გამოც [შენობა] ასე სწრაფად დაიწვა, არის ასეთი მოპირკეთება”, — განუცხადა მან ესპანურ მედიას.