საქართველომ ყოფილი პრეზიდენტის, მიხეილ სააკაშვილის ექსტრადიციის შესახებ, უკრაინას რამდენიმე წლის წინ მიმართა და შედეგად უარი მიიღო. ამას ადასტურებს 2015 წლის პირველ აპრილს, უკრაინის გენერალური პროკურატურის გამოქვეყნებული განცხადება.

რელიზში ნათქვამია, რომ უკრაინის გენერალურმა პროკურატურამ დაასრულა საქართველოს გენერალური პროკურორის მოთხოვნის განხილვა მიხეილ სააკაშვილის ექსტრადაციის საკითხზე. შედეგად, პროკურორის დასკვნით, არსებობდა რისკი, რომ სააკაშვილის ექსტრადიციის თხოვნის უკან პოლიტიკური დევნის სურვილი დგას:

"მისი ექსტრადიცია შესაძლოა წინააღმდეგობაში მოვიდეს ადამიანის უფლებების დაცვისა და ფუნდამენტური თავისუფლებების ევროპულ კონვენციასთან".

უკრაინის პრეზიდენტმა, პეტრო პოროშენკომ დღეს, 18 ივლისს საქართველოში ოფიციალური ვიზიტისას თქვა, რომ ყოფილი პრეზიდენტის მიხეილ სააკაშვილის ექსტრადირება უკრაინას არ განუხილავს, ვინაიდან საქართველოს მათთვის არ მიუმართავს.