რა ხდება: საქართველოს პრეზიდენტი, სალომე ზურაბიშვილი დოიჩე ველესთვის (DW) მიცემულ ინტერვიუში ამბობს, რომ ოქტომბერში დაგეგმილ საპარლამენტო არჩევნებში რუსეთის ჩარევას ელის.

• ინტერვიუში ზურაბიშვილმა ისიც აღნიშნა, რომ საქართველო-რუსეთის ურთიერთობებში რაიმე ტიპის ცვლილება მოსალოდნელი არ არის, რადგან სიტუაციის შეცვლა მხოლოდ რუსეთის გასვლას შეუძლია მის მიერვე ოკუპირებული ტერიტორიებიდან — როგორც საქართველოდან, ასევე, უკრაინიდან.

სალომე ზურაბიშვილი: "ჩვენ უფრო ახლოს ვართ და უკეთ ვიცნობთ რუსეთის სპეცსამსახურებს. გარკვეულწილად, მათთვის უფრო იოლია საქართველოს შიდა საქმეებში ჩარევა, რადგან საქართველო მათთვის ნაცნობი პლატფორმაა. ამასთან, ქართველი ხალხი კარგად იცნობს საბჭოთა პროპაგანდას, რომელიც დიდად არ განსხვავდება დღევანდელი რუსული პროპაგანდისგან. ასე რომ, შესაძლოა, მათი [ხალხის] მედეგობა ოდნავ მაღალი იყოს, თუმცა, ჩვენ რისკის ქვეშ ვიქნებით. რისკი წელს მეტი იქნება, რადგან ოქტომბერში საპარლამენტო არჩევნები გაიმართება. საქართველოს წინააღმდეგ ჰიბრიდული ომი მიმდინარეობს."

• პრეზიდენტი "შიდა-პოლიტიკურ ბრძოლებზე": სალომე ზურაბიშვილმა უპასუხა DW-ს მიერ დასმულ შეკითხვას საქართველოში მიმდინარე "პოლიტიკური ბრძოლების" თაობაზეც, იმ კონტექსტში, რომ მას, საქართველოს ხელისუფლება არ აძლევს ნებართვას საზღვარგარეთ საქმიანი ვიზიტებისთვის.

სალომე ზურაბიშვილი: "სხვა ნებისმიერი ქვეყნის მსგავსად, აქაც შიდა-პოლიტიკური ბრძოლებია, მაგრამ ძალიან მნიშვნელოვანი ის არის, რომ ეს ვიზიტები სრულიად შეთანხმებულია ქართველ ხალხთან. დამოუკიდებლობის მომენტიდან, ქართველი ხალხი მხარს უჭერს ქართულ გზას ევროპისკენ და ეს არასოდეს შეცვლილა, არ მაშინ, როცა საქართველო იყო ოკუპირებული ან დატყვევებული და ეს არც მომავალში შეიცვლება, რადგან ეს არის ერთადერთი პერსპექტივა, რომელიც რეალურად არსებობს ამ ქვეყნისთვის", — უთხრა საქართველოს პრეზიდენტმა გერმანულ მედიას, DW-ს.

• ზურაბიშვილი ზელენსკისთან შეხვედრაზე: მიუნხენში გამართული უსაფრთხოების კონფერენციაზე, უკრაინის პრეზიდენტთან, ვოლოდიმირ ზელენსკისთან შეხვედრის შესახებ დასმულ კითხვაზე ზურაბიშვილმა თქვა, რომ "მე აქ ვარ მხოლოდ იმისთვის, გამოვხატო ჩემი მხარდაჭერა და სოლიდარობა ქართველი ხალხის სახელით — ამაში დარწმუნდებიან საქართველოში ჩამოსული სტუმრები, რომლებიც თბილისში ბევრ უკრაინულ დროშას დაინახავენ. ამიტომ, მინდა გამოვხატო ჩემი სოლიდარობა, მეტი არაფერი შემიძლია. თუმცა ვფიქრობ, ამჯერად ეს [სოლიდარობის გამოხატვა] მნიშვნელოვანია, რადგან ჩვენ კანდიდატი ქვეყნების ასოცირებული ტრიოს ნაწილი ვართ, და რაც მთავარია, ჩვენ, მოლდოვასთან ერთად, ვართ სამი ქვეყანა, რომლებსაც სჭირდებათ უსაფრთხოება შავ ზღვაზე".

კიევის მხარდაჭერაზე საუბრისას, ასევე, აღნიშნა, რომ როგორც ქართველს, ესმის იმ ბრძოლის მნიშვნელობა, რაც უკრაინამ დანარჩენი ევროპისთვის გაიღო

• და ზურაბიშვილი იმედოვნებს, რომ ამერიკის შეერთებული შტატები მალე დაამტკიცებს გადაწყვეტილებას, უკრაინისთვის დახმარების გამოყოფის შესახებ.

სალომე ზურაბიშვილი: "ვფიქრობ, ევროპამ სწორი გადაწყვეტილება მიიღო, როდესაც გამოყო 50 მილიარდი დოლარი უკრაინის მხარდასაჭერად და იმავეს ელოდება ამერიკის კონგრესისგან. დარწმუნებული ვარ, ეს ადრე თუ გვიან მოხდება, თუმცა, დრო გადამწყვეტ როლს თამაშობს აქ და რაც უფრო ადრე მოხდება ეს, მით უკეთესი", — თქვა საქართველოს პრეზიდენტმა.

ბოლო ხაზი: მიუნხენის უსაფრთხოების კონფერენციის ფარგლებში სალომე ზურაბიშვილმა უცხოური მედიისთვის მიცემულ კიდევ ერთ ინტერვიუში თქვა, რომ საქართველო მუშაობს, რათა უკრაინასა და მოლდოვას დაეწიოს, რომლებიც ევროკავშირში გაწევრიანების გზაზე უფრო წინ არიან.

გაიგე მეტი: პრეზიდენტი ივანიშვილზე, ევროინტეგრაციაზე და რუსულ საფრთხეებზე — ინტერვიუ Euractiv-თან