რა ხდება: ცენტრალურ საარჩევნო კომისიია (ცესკო) იუწყება, რომ 2024 წლის პარლამენტის არჩევნებისთვის მზადების პროცესი იყო მთავარი თემა აშშ-ის ელჩის, რობინ დანიგანისა და ცესკოს თავმჯდომარის, გიორგი კალანდარიშვილის გაცნობითი შეხვედრისას.

რა ითქვა შეხვედრაზე: "ჩვენ შევთანხმდით, რომ ეს არჩევნები არის შესაძლებლობა საქართველოსთვის დემოკრატიის სიძლიერის წარმოსაჩენად. ასევე, განვიხილეთ აშშ-ის მხარდაჭერა ამ პროცესის მიმართ", — ცესკოს მიერ გავრცელებული პრესრელიზის მიხედვით, ამის შესახებ ამერიკის შეერთებული შტატების ელჩმა, რობინ დანიგანმა განაცხადა.

ამასთან, აშშ-ის ელჩმა 26 ოქტომბრის არჩევნებისთვის ცესკოს მიერ განხორციელებული და დაგეგმილი აქტივობები დადებითად შეაფასა და საარჩევნო ადმინისტრაციას მხარდაჭერა გამოუცხადა.

  • რობინ დანიგანი: "ჩვენ ვისაუბრეთ იმაზე, თუ რა მნიშვნელობა აქვს ცესკოს საარჩევნო პროცესში აქ, საქართველოში, და ზოგადად, ყველგან, მსოფლიო მასშტაბით. ცენტრალური საარჩევნო კომისიის თანამშრომლები ასრულებენ უაღრესად მნიშვნელოვან სამუშაოს დემოკრატიული პროცესისთვის. ჩვენ ცესკოს მხარს ვუჭერთ სხვადასხვა პროგრამით და ამას გავაგრძელებთ მომავალშიც. მხარს დავუჭერთ საერთაშორისო სადამკვირვებლო მისიებს.
  • ჩვენი რეალური მიზანი, აშშ-ის მიზანია, რომ პროცესი იყოს მაქსიმალურად გამჭვირვალე, თავისუფალი და სამართლიანი და ქართველებს ჰქონდეთ შესაძლებლობა გამოიყენონ თავიანთი ხმის უფლება."

როგორც ცესკო აცხადებს, შეხვედრისას გიორგი კალანდარიშვილმა აღნიშნა, რომ საარჩევნო ადმინისტრაცია მზად არის ტექნოლოგიების გამოყენებით საერთაშორისო სტანდარტების შესაბამისი არჩევნების ჩასატარებლად.

  • გიორგი კალანდარიშვილი: "ჩვენ განვიხილეთ 26 ოქტომბრის არჩევნების სამზადისი, ის გამოწვევები და საჭიროებები, რომელიც დღეს ინსტიტუციის წინაშე დგას. ვისაუბრეთ საარჩევნო ადმინისტრაციის მნიშვნელოვან როლზე საარჩევნო პროცესებში, საერთაშორისო პარტნიორების მხარდაჭერის მნიშვნელობაზე და რა თქმა უნდა, თანამშრომლობის კიდევ უფრო მეტად გაღრმავების შესაძლებლობებზე."