მოკლედ: პროკურორი როინ ხინთიბაძე, რუსთავი 2-თან ინტერვიუში საუბრობს იმ წინაპირობების შესახებ, რა შემთხვევაშიც, შესაძლოა, გამოსახლების საწინააღმდეგო აქციაზე დაკავებული კაკო ჩიქობავა და გიორგი ხასაია პატიმრობიდან გაათავისუფლონ.

დეტალები: ხინთიბაძე ამბობს, რომ ჩიქობავასა და ხასაიას მიმართ პატიმრობის მოთხოვნას, სხვა გარემოებებთან ერთად, საფუძვლად დაედო ის ფაქტი, რომ ისინი არ ინანიებდნენ ჩადენილს და ზიანი არ ჰქონდათ ანაზღაურებული.

სტრიქონებს შორის: კაკო ჩიქობავა და გიორგი ხასაია მხოლოდ ნაწილობრივ აღიარებენ ბრალდებას — აღიარებენ ნივთის დაზიანების ფაქტს, თუმცა, არ ეთანხმებიან ბრალდების იმ ნაწილს, სადაც საუბარია იმაზე, რომ ამას ჯგუფური ხასიათი ჰქონდა.

• "იმ შემთხვევაში, თუ ბრალდებულები დანაშაულს აღიარებენ და ზიანს აანაზღაურებენ, ბრალდების მხარე მზად არის, პატიმრობა შეიცვალოს უფრო ნაკლებად მკაცრი აღკვეთის ღონისძიების გამოყენებით", — განაცხადა პროკურორმა.
• On.ge დეტალების გარკვევას ბრალდებულების ადვოკატთან ცდილობს. მასთან დაკავშირების შემთხვევაში, მასალა განახლდება.

კონტექსტი: კაკო ჩიქობავა და გიორგი ხასაია 23 იანვარს, კეკელიძის ქუჩაზე ხატიაშვილების საცხოვრებელი ბინიდან გამოსახლების პროცესისას დააკავეს, აღსრულების პოლიციის ავტომობილის დაზიანებისთვის.

• პროკურორის ინფორმაციით, ბრალდებულებმა სახელმწიფო უწყებას 3 380 ლარის ოდენობის ზიანი მიაყენეს.
• ორივე მათგანს 3-დან 6 წლამდე პატიმრობა ემუქრება.

სოლიდარობის კამპანია დაკავებულთა მიმართ: დაკავებულების მიმართ სოლიდარულია აკადემიური საზოგადოება. ორივე მათგანი — ხასაიაც და ჩიქობავაც ლექტორები არიან.

• 26 იანვარს, მათი გათავისუფლების მოთხოვნით მაისის სტუდენტურმა მოძრაობამ თსუ-ს ადმინისტრაცია დაიკავა.
• დღეს, 30 იანვარს, ილიას უნივერსიტეტის რექტორმა, ნინო დობორჯგინიძემ საჯარო წერილით მიმართა სააპელაციო სასამართლოს, რომელშიც ნათქვამია, რომ დაკავებულ ლექტორებს აკადემიური საზოგადოება ახასიათებს, როგორც მაღალი მოქალაქეობრივი პასუხისმგებლობის მქონე ახალგაზრდებს.
• ილიას უნივერსიტეტის რექტორის განცხადებას თბილისის სახელმწიფო უნივერსიტეტის რექტორის ჯაბა სამუშიას განცხადება მოჰყვა:
• "აკაკი ჩიქობავა არის ივანე ჯავახიშვილის სახელობის თბილისის სახელმწიფო უნივერსიტეტის მოწვეული ლექტორი. მიგვაჩნია, რომ მის მიმართ გამოყენებული აღკვეთის ღონისძიების ფორმა არის მკაცრი და ვთხოვთ სასამართლოს აღნიშნული აღკვეთის ღონისძიება შეცვლილი იქნას აღკვეთის ღონისძიების უფრო მსუბუქი ფორმით", — წერია განცხადებაში.
• მანამდე, 27 იანვარს, თბილისის სახელმწიფო უნივერსიტეტის პროფესორებმა განაცხადეს, რომ მზად არიან, თავდებში ჩაუდგნენ აკაკი ჩიქობავას, როგორც თსუ-ს მოწვეულ პროფესორს.

ბოლო ხაზი: მოძრაობა ხმამ, რომელიც აქტიურად აპროტესტებს გასახლების პოლიტიკასთან დაკავშირებით სახელმწიფოს მიდგომებს, მარში დააანონსა 4 თებერვალს და ამბობენ, რომ დაკავებული ლექტორების გათავისუფლების მოთხოვნა ერთ-ერთი ძირითადი საკითხი იქნება.