უკრაინული გამოცემა The Экономист დაინტერესდა, აირჩევდნენ თუ არა უკრაინის მოქალაქეები პრეზიდენტად საქართველოს ექსპრეზიდენტს, მიხეილ სააკაშვილს, თუ ის შეძლებდა უკრაინის ხელისუფლების შეცვლას.

კითხვას, მისცემდით თუ არა ხმას მიხეილ სააკაშვილს უკრაინის საპრეზიდენტო არჩევნებში?, 10 400-მა ადამიანმა უპასუხა. მათი 83% სააკაშვილის პრეზიდენტობას მხარს უჭერს, 17 პროცენტი კი - არა.

გამოკითხვას სააკაშვილი გამოეხმაურა და აღნიშნა, რომ პრეზიდენტობას არ აპირებს:

"ამ გამოცემას არ ვუყვარვარ, მაგრამ მადლობა, რომ შედეგები არ გააყალბეთ. სხვათაშორის, პრეზიდენტობას არ ვაპირებ, ასე რომ, ეს გამოკითხვა მხოლოდ თეორიულია" - წერს სააკაშვილი ფეისბუკზე.

პარტია "ახალი ძალების პლატფორმა" ოპოზიციაში გადასულმა მიხეილ სააკაშვილმა 2016 წლის 11 ნოემბერს დააფუძნა და უკრაინაში ვადამდელი არჩევნები მოითხოვა.

სააკაშვილი აცხადებს, რომ მისი მიზანია უკრაინაში შეცვალოს ე.წ. პოლიტიკური ელიტა, რომელსაც კორუფციაში ადანაშაულებს.