რა ხდება: ერთიანი ნაციონალური მოძრაობა თბილისის მერს, კახა კალაძეს, კორუფციაში ადანაშაულებს. პარტიის გენერალური მდივნის მოადგილემ, ირაკლი ფავლენიშვილმა და იურსიტმა, ლაშა ტყეშელაძემ, წერეთლის გამზირის რეაბილიტაციის გართულებულ პროცესთან დაკავშირებით, ბრიფინგი გამართეს.

დეტალები: ტყეშელაძის თქმით, რეაბილიტაციისთვის გამოყოფილით თანხები გაფლანგული და მითვისებულია. ამიტომ ის პროკურატურას გამოძიებისკენ მოუწოდებს.

  • ირაკლი ფავლენიშვილი კი კახა კალაძეს მიმართავს, თბილისის საკრებულოს უახლოეს სხდომაზე გასცეს პასუხები როგორც ნაციონალური მოძრაობის, ასევე, თბილისელების კითხვებს, წერეთლის რეაბილიტაციასთან დაკავშირებით.
  • "მას აკისრია პასუხისმგებლობა, გასცეს პასუხი კონკრეტულ ბრალდებებს, თუმცა, რა თქმა უნდა, ეჭვი გვეპარება, რომ მას ეყოს გამბედაობა, მოვიდეს [საკრებულოს სხდომაზე]", — აღნიშნა ფავლენიშვილმა.

კონტექსტი: ერთიანი ნაციონალური მოძრაობა წერეთლის გამზირთან დაკავშირებულ პროცესს ეხმიანება მას შემდეგ, რაც 16 იანვარს ცნობილი გახდა, რომ თბილისის მერიამ კონტრაქტი შეუჩერა ორ კომპანიას, რომელთაც პროექტის რეაბილიტაცია იანვრის ბოლომდე უნდა დაესრულებინათ.

  • მეორე დღეს, 17 იანვარს მერიამ, სანაცვლოდ, დაიქირავა 4 კოპმანია. ესენია: ენკო, პარმა, ჯეო გრუპი და ბლექ სი გრუპი.
  • იმავე დღეს, ენმ-ის პოლიტსაბჭოს წევრმა მერიასთან ტალახი მიიტანა და თქვა, რომ ეს კალაძის კორუფციის სიმბოლოა.
  • ნეტგაზეთის მიხედვით, მერია წერეთლის გამზირის ორ კვირაში დასრულებისთვის თითქმის 18 მილიონს იხდის.

ბოლო ხაზი: წერეთლის გამზირის რეაბილიტაცია 2023 წლის 19 აპრილს დაიწყო და 2024 წლის იანვრის ბოლოსთვის უნდა დასრულებულიყო. მთლიანობაში, პროექტისთვის გამოყოფილი იყო 32 600 000 ლარი. აქედან წერეთლის გამზირის რეაბილიტაციისთვის 28 მილიონ 400 ათასი, დანარჩენი — დიდუბის რაიონში, შოთა შალიკაშვილის სახელობის ხიდის რეაბილიტაციისთვის დაიხარჯა.