მოკლედ: პატრიოტთა ალიანსის გენერალური მდივანი, ირმა ინაშვილი საპატრიარქოს განცხადებას გამოეხმაურა.

  • "ვინაიდან საპატრიარქო მოგვიწოდებს, უნდა დავემორჩილოთ, მაგრამ ეს არ ნიშნავს, რომ ხატის შეურაცხყოფა უნდა ვაპატიოთ ვინმეს" — აღნიშნულია მის განცხადებაში.

რა ხდება: საქართველოს საპატრიარქო აცხადებს, რომ მატრონა მოსკოველის ხატზე იოსებ სტალინის გამოსახვა არაკანონიკურია და მოუწოდებს შემომწირველებს, ხატში სათანადო ცვლილებები შეიტანონ.

  • წინააღმდეგ შემთხვევაში, ცვლილებებს თავად განახორციელებენ.
  • საუბარია ხატზე, რომელიც სამების საკათედრო ტაძარშია განთავსებული და მის ფრაგმენტზე საბჭოთა ლიდერია გამოსახული.

დეტალები: საპატრიარქოს განცხადებაში წერია, რომ ხატზე, ხატწერის კანონიკური წესებიდან გამომდინარე, შეიძლება დახატული იყოს არა მხოლოდ წმინდანი, არამედ წმინდანის ცხოვრებასთან დაკავშირებული რეალური ისტორიები ნებისმიერი პიროვნების გამოსახულებით, მათ შორის, ხელისუფლებიც და რიგითი ადამიანებიც, "მწვალებლებიც და ქრისტიანული სარწმუნოების მდევნელნიც, თვით წმინდანის მწამებელნიც კი";

  • თუმცა, უწყების განმარტებით, ეს საერთოდ არ ნიშნავს, რომ ხატი ამ პირებს განადიდებს. ასეთი დეტალებით წმინდანებთან დაკავშირებული უტყუარი ფაქტების ასახვა ხდება.

"ვინაიდან ი. სტალინის შეხვედრა წმ. მატრონასთან, არასაკმარისი მტკიცებულებების გამო, არ არის შეტანილი მისი ცხოვრების კანონიკურ ტექსტში, არ არის აღიარებული რუსეთის ეკლესიის მიერ, რომელმაც იგი წმინდანად შერაცხა და ამ საკითხთან დაკავშირებით სპეციალური კვლევაც ჩაატარა, აუცილებელია აღნიშნული ეპიზოდის შეცვლა და ხატწერის კანონიკასთან დაკავშირებული სხვა დეტალების გათვალისწინებაც.

მივმართავთ შემომწირველთ, თვითონ შეიტანონ სათანადო ცვლილებები ხატში, ან ამას ჩვენ გავაკეთებთ," — წერია განცხადებაში.

ბოლო ხაზი: "პატრიოტთა ალიანსის" ლიდერებმა, რამდენიმე დღის წინ განაცხადეს, რომ ხატი, სამების საკათედრო ტაძარს მათ შესწირეს.

მსგავსი: სამებაში ხატს, რომელზეც სტალინია გამოსახული, ლურჯი საღებავი შეასხეს (ვიდეო)

ამავე თემაზე: სამების საკათედრო ტაძრიდან სტალინის გამოსახულებიანი ხატის გამოტანის მოთხოვნით პეტიცია შეიქმნა