საქართველოს მართლმადიდებლური ეკლესიის პატრიარქის რეფერანტის, შორენა თეთრუაშვილის, დაკითხვა ციანიდის საქმეზე თბილისის საქალაქო სასამართლოში თითქმის ერთი საათია მიმდინარეობს.

თეთრუაშვილს ჟურნალისტების კითხვებზე არც საპატრიარქოს დატოვებისას და არც სასამართლოში მისვლისას არ უპასუხია.

დღეს შეიძლება დაიკითხოს ეპისკოპოსი იაკობიც.

დეკანოზი გიორგი მამალაძე 2017 წლის 10 თებერვალს, თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. პროკურატურის ინფორმაციით, გიორგი მამალაძეს ციანიდის გამოყენებით პატრიარქის მდივანე-რეფერენტის, შორენა თეთრუაშვილის მკვლელობა ჰქონდა განზრახული.

პროკურატურისვე ცნობით, შესაძლო დანაშაულის შესახებ სამართალდამცავებს ჟურნალისტმა ირაკლი მამალაძემ აცნობა. მათ გამოაქვეყნეს ფარული ჩანაწერები, რომელზეც ირაკლი მამალაძემ აღბეჭდა თავისი და დეკანოზის საუბარი ციანიდთან დაკავშირებით. სწორედ ეს ჩანაწერი არის ე.წ. ციანიდის საქმის ერთ-ერთი მტკიცებულება.

გიორგი მამალაძე ბრალს არ აღიარებს. მისი ოჯახის წევრები მიიჩნევენ, რომ დეკანოზს პროვოკაცია მოუწყო პატრიარქის ქორეპისკოპოსმა იაკობმა და ასევე, შორენა თეთრუაშვილმა. რამდენიმეკვირიანი თხოვნის შემდეგ, 23 ივნისს, დეკანოზის ოჯახის შეხვდა პატრიარქ ილია მეორეს. მათ პატრიარქს გიორგი მამალაძისთვის თავდებობა სთხოვეს, პატრიარქმა მათ თხოვნას არ უპასუხა, საპატრიარქოს წარმომადგენლებმა კი თქვეს, რომ ეს შეუძლებელია.

ბათუმისა და ლაზეთის ეპარქიამ, სადაც პატრიარქის მდივნის მკვლელობის მცდელობაში ბრალდებული დეკანოზი გიორგი მამალაძე მსახურობდა, 27 ივნისს განცხადება გაავრცელა. განცხადებაში წერია, რომ გამოძიების დასრულებამდე მას უჩერებენ მღვდელმსახურებისა და ზიარების უფლება.