• ინფორმაციას ორგანიზაცია საერთაშორისო გამჭვირვალობა - საქართველო ავრცელებს.

მოკლედ: მიმდინარე წლის 4 ნოემბერს, საქართველოს რკინიგზამ 10 ელმავლის შესასყიდად 184 მლნ ლარის ღირებულების ტენდერი გამოაცხადა, რომელიც სავარაუდოდ, მორგებული ტენდერია, რადგან მასში მხოლოდ იმ კომპანიებს შეუძლიათ მონაწილეობა, რომლებიც რუსეთის დაარსებულ ევრაზიულ კავშირში გაცემულ სერტიფიკატს ფლობენ.

დეტალები: ტენდერში მიმწოდებლებს წინადადების წარდგენა 3 დეკემბრიდან 5 დეკემბრამდე შეეძლებათ, ხოლო გამარჯვებულმა ელმავლები 2024 წლის ბოლომდე უნდა მიაწოდოს. შესყიდვების ელექტრონულ საიტზე ატვირთულ დოკუმენტაციაში მითითებულია, რომ შესყიდვაში მონაწილეობის მსურველმა კომპანიამ უნდა წარმოადგინოს:

  • "შემოთავაზებულ საქონელზე გაცემული “НБ ЖТ ЦТ 04-1998” ან “ТР ТС 001/2011"-ის მოთხოვნებთან შესაბამისობის დამადასტურებელი სერტიფიკატი, რომელიც გაცემული უნდა იყოს დსთ-ს ქვეყნების სარკინიგზო ტრანსპორტის საბჭოს რეესტრით გათვალისწინებული აკრედიტებული ორგანიზაციის მიერ".
  • საბაჟო კავშირში იგულისხმება ევრაზიის საბაჟო კავშირი, რომელიც რუსეთის მიერ დაარსებული ევრაზიის ეკონომიკური კავშირის (ევრაზიული კავშირი) ნაწილია და მასში შედიან: რუსეთი, ყაზახეთი, ბელარუსი, სომხეთი და ყირგიზეთი.
  • ამ ჩანაწერით, საქართველოს რკინიგზამ ფაქტობრივად დაავიწროვა ელმავლის მწარმოებელი ქვეყნების წრე — მიიჩნევს ორგანიზაცია.

ბოლო ხაზი: საერთაშორისო გამჭვირვალობა - საქართველოს განცხადებით, საქართველოს რკინიგზის მიერ 4 ნოემბერს გამოცხადებული ტენდერი პირდაპირ არღვევს შესყიდვების მონაწილეთა მიმართ სამართლიან და არადისკრიმინაციულ მიდგომას (კანონი სახელმწიფო შესყიდვების შესახებ, მუხლი 2), რადგან ფაქტობრივად რუსულ სერტიფიკატს ითხოვს. შემსყიდველი ყურადღებას უნდა ამახვილებდეს მიმწოდებელი კომპანიის კვალიფიკაციაზე, შესასყიდი საქონლის ხარისხზე და არა მის წარმომავლობაზე.