მთავრობის სხდომაზე ირაკლი ღარიბაშვილმა განაცხადა, რომ 2024 წელს ნაერთი ბიუჯეტი 27 მილიარდ 800 მილიონი ლარი იქნება.

  • მთავრობის გათვლებით, დეფიციტი 2024 წელს 2,5%, ხოლო მთავრობის ვალის მაჩვენებელი მშპ-ის 38,2% იქნება.
  • "რაც შეეხება 2024 წლის ბიუჯეტს, ასევე დაგეგმილია საკმაოდ კონსერვატიული მიდგომით. ჩვენ ჩადებული გვაქვს ეკონომიკის 5,2 %-ის ზრდა. საშუალო ვადიან პერიოდშიც რეალური ეკონომიკური ზრდის პროგნოზი არის ასევე 5%; საშუალო ინფლაციის პროგნოზი მიზნობრივი მაჩვენებლის ფარგლებში 2,8%-ს შეადგენს; ნომინალური მთლიანი შიდა პროდუქტი არის 85 მილიარდ 370 მილიონი ლარი; მთლიანი შიდა პროდუქტი იქნება 85 მილიარდ 370 მილიონი ლარი, რაც, რა თქმა უნდა არის ძალიან დიდი პროგრესი", — თქვა ღარიბაშვილმა.
  • 2024 წლის ბიუჯეტის პირველი ვარიანტი პარლამენტს გადაეგზავნება.

დეტალები: პრემიერმინისტრის თქმით, ჯანდაცვის და სოციალური დაცვის პროგრამების ბიუჯეტი 870 მლნ ლარით იზრდება და გათვალისწინებულია პენსიების ზრდა.

  • მთავრობის გეგმით, 70 წლის და მეტი ასაკის პენსიონერთა პენსია 50 ლარით გაიზრდება და 415 ლარი გახდება.
  • ამავე კატეგორიის პენსიონერთა პენსია მაღალმთიან დასახლებებში კი "თითქმის 500 ლარი" გახდება.
  • ხოლო 70 წლამდე პირთა პენსია 20 ლარით გაიზრდება და 315 ლარით განისაზღვრება, მაღალმთიან დასახლებებში კი 380 ლარი იქნება.

გარდა ამისა, ღარიბაშვილის თქმით, ჯამში, სოციალური პროგრამების დაფინანსება 5,6 მლრდ ლარი იქნება. ჯანდაცვის პროგრამების დასაფინანსებლად 1,6 მლრდ ლარი გამოიყოფა და გათვალისწინებული იქნება პირველადი ჯანდაცვის პერსონალის ხელფასების 10%-იანი ზრდა.

  • "ბიუჯეტში გათვალისწინებულია ყველა საჯარო მოხელის ხელფასების ზრდა, ასევე, 10%-ით ზრდა", — განაცხადა ირაკლი ღარიბაშვილმა .
  • პრემიერმინისტრის თქმით, ბიუჯეტი ეზრდება შს-ს და თავდაცვის სამინისტროს, განათლების სამინისტროში კი მნიშვნელოვანი რეფორმები და სიახლეები იქნება.
  • "470 მილიონი ლარით იზრდება განათლების ბიუჯეტი. გარდა ამისა, მინდა ვთქვა, რომ საჯარო სკოლების მასწავლებელთა ანაზღაურების ზრდის საკითხს ჩვენ ვამუშავებთ და ახალ მინისტრთან ერთად ოქტომბრის ბოლოს წარმოგიდგენთ ახალ კონცეფციას. რაც შეეხება საჯარო სკოლების მშენებლობა-რეაბილიტაციას, გამოყოფილია 350 მილიონი ლარი, მაღალი ტემპებით წავა აქ მშენებლობა-რეაბილიტაციის პროცესი. საბავშვო ბაღების მშენებლობა-რეაბილიტაციაზე მიემართება 225 მილიონი ლარი. ესეც დაწყებული გვაქვს. ბაღებში თანამშრომელთა ხელფასების ზრდა იქნება გათვალისწინებული", — თქვა ღარიბაშვილმა.