შოტლანდიის მაღალმთიან რეგიონში ლოხ-ნესის ურჩხულს ეძებენ. ტბაზე მეცნიერების გუნდთან ერთად, ასობით მოხალისე მუშაობს, რომელიც ნებისმიერ უჩვეულო ხმასა და ტბის ზედაპირზე მოძრაობას აკვირდებიან.

ურჩხულთან დაკავშირებული ლეგენდები საუკუნეების განმავლობაში არსებობდა, თუმცა თანამედროვე მითი მხოლოდ 90 წელს ითვლის. 1933 წლის აპრილში, ტბაზე არსებული სასტუმროს მენეჯერმა, ელდი მაკეიმ, თქვა, რომ ტბაში ვეშაპის მსგავსი არსება დაინახა.

მედიაში ამ ამბის გაშუქებისას ერთ-ერთი გაზეთის მაშინდელმა რედაქტორმა, ევან ბარონმა, გადაწყვიტა, რომ არსებისთვის "ურჩხული" ეწოდებინათ, მითიც სწორედ აქედან წამოვიდა. მას შემდეგ ლოხ-ნესის ურჩხულმა შთააგონა წიგნები, სატელევიზიო შოუები და ფილმები, ხოლო ტბა შოტლანდიის ერთ-ერთ ძირითად ღირსშესანიშნაობად აქცია.

ცნობილ და ბევრი მითქმა-მოთქმის გამომწვევ ფოტოზე, რომელიც 1934 წელს ექიმმა, რობერტ კენეტ უილსონმა, მიჰყიდა Daily Mail-ს, ასახულია არსება გრძელი, მოხდენილი, გედის მსგავსი კისრით, რომელიც ძალიან ჰგავს პლეზიოზავრს.

არსებობდა თეორია, რომ ფოტოზე აღბეჭდილი არსება შეიძლება გიგანტური გველთევზა ყოფილიყო, თუმცა ეს ვერ დამტკიცდა. არსებობს ის მოსაზრებაც, რომ ფოტოზე ასახული "ურჩხული" სინამდვილეში მხოლოდ თიხის სკულპტურაა და ვიღაცამ უბრალოდ ბოროტად იხუმრა.

ტბაზე ძველი სასტუმროს შენობა დღეს ლოხ-ნესის ცენტრია, რომელმაც გასულ შაბათ-კვირას ურჩხულზე ნადირობა დაიწყო. იქ ასობით ადამიანია შეკრებილი — მკვლევრები, მოხალისეები, მედიის წარმომადგენლები ან რა თქმა უნდა, სეირის მაყურებლები.

ძებნა დრონებით, ინფრაწითელი კამერებითა და ჰიდროფონებით მიმდინარეობს, რომლებიც გამოსახულებასთან ერთად ხმასაც იწერს. ტბა უზარმაზარია და მას უფრო მეტი წყლის დატევა შეუძლია, ვიდრე ინგლისისა და უელსის ყველა ტბას ერთად, რაც ძებნას ართულებს.

ლოხ-ნესის ცენტრის გენერალური მენეჯერი პოლ ნიქსონი ამტკიცებს, რომ ამჯერად ეს უფრო მეტია, ვიდრე პიარ ხრიკი.

"დრონების ზოგიერთი კადრი, რომელიც წყლის სიღრმეში ობიექტს ასახავს, აჩვენებს სატრანზიტო ფურგონის ზომის ობიექტს, რომელიც არ ვიცით, რა არის. ის კადრიდან რაღაც დროის შემდეგ გაქრა", — აცხადებს ის.

ორგანიზატორებმა განაცხადეს, რომ ეს ლოხ-ნესის ურჩხულზე ყველაზე მასშტაბური სამძებრო სამუშაოებია 1972 წლის შემდეგ. წლების განმავლობაში ჩატარებულმა არაერთმა კვლევამ ურჩხულის კვალი ვერ აღმოაჩინა.

ალან მაკკენა, მოხალისე კვლევითი ჯგუფიდან Loch Ness Exploration, ამტკიცებს, რომ ტბაზე პარასკევს სისტემის შემოწმებისას უჩვეულო ხმები მოისმინეს.

"ყველანი ცოტათი აღელვებულები ვიყავით. გავიქეცით, რათა დავრწმუნებულიყავით, რომ ჩამწერი ჩართული იყო და აღმოვაჩინეთ, რომ არ ყოფილა", — დამწუხრებით აღიარა მან.

ამავე თემაზე:

• ლოხ-ნესის ურჩხული გიგანტური გველთევზა იყო? — ახალი კვლევა გავრცელებულ ჰიპოთეზას უარყოფს