რატომ არის მნიშვნელოვანი: 6 ივნისიდან 3000-ზე მეტი მაღაროელი და მათი ოჯახის წევრები მძიმე სამუშაო პირობების გაუმჯობესების მოთხოვნით საპროტესტო აქციებს მართავენ.

  • მეოთხე დღეა, პროტესტმა თბილისში, პარლამენტის წინ გადმოინაცვლა.
  • გაფიცულების ნაწილმა უვადო შიმშილობა გამოაცხადა.
  • ერთ-ერთმა მაღაროელმა, გიორგი კუპატაძემ, თვალები ამოიკერა, კიდევ ერთ გაფიცულს კი პირი აქვს ამოკერილი.
  • საუბარია ისეთი ბაზისური შრომითი უფლებების დაცვაზე, როგორებიცაა: ხელფასის ზრდა ინფლაციის გათვალისწინებით, შრომის უსაფრთხოება, აღჭურვილობისა და სპეცტანსაცმლის შეცვლა, სანგრების განიავება, საშხაპეების მოწყობა, ახალი, მეტად დატვირთული და ნაკლებად ანაზღაურებული სამუშაო გრაფიკიდან, ძველ განრიგზე დაბრუნება.

დეტალები: არასამთავრობო ორგანიზაციების შეფასებით, დასაქმებულთა ბრძოლა როგორც კომპანიის, ისე სახელმწიფოს მხრიდან რეალური და ეფექტური რეაგირების გარეშეა დატოვებული.

  • "სიტუაცია ყოველდღიურად მძიმდება და ადამიანების სიცოცხლესა და ჯანმრთელობაზე შეუქცევადი ზიანის საფრთხეებს აჩენს, რის გამოც კომპანიისა და სახელმწიფოს მხრიდან გამოჩენილი უმოქმედობა და საკითხის მიმართ ფორმალური დამოკიდებულებები ამ ადამიანების, მათზე ფინანსურად დამოკიდებული ოჯახის წევრებისა და მაღაროელთა შრომაზე ეკონომიკურად დამოკიდებული მთელი ქალაქის გაწირვის ფორმას იღებს", — ნათქვამია განცხადებაში.

ორგანიზაციები მთავრობას მოუწოდებენ: გამოიყენოს მის ხელთ არსებული ყველა ბერკეტი, კომპანიასთან რეალური მოლაპარაკების ჩათვლით, "რათა თავიდან იქნას აცილებული მოსალოდნელი ტრაგედია, რომელიც შესაძლოა პროტესტის უმწვავესი ფორმების გამოყენებას მოჰყვეს".

  • იმოქმედოს დაუყოვნებლივ და ეფექტურად, რათა კომპანიამ შეასრულოს მაღაროელებთან კოლექტიური ხელშეკრულებითა და საქართველოს კანონმდებლობით გათვალისწინებული ვალდებულებები, რომ დაკმაყოფილდეს ჭიათურელი მაღაროელების ბაზისური და სამართლიანი მოთხოვნები.

ჯანდაცვის სამინისტროს NGO-ები მიმართავენ გაააქტიუროს და არსობრივად წარმართოს მედიაციის პროცესი;

  • პროტესტის მიმდინარეობისას, უზრუნველყოს მოშიმშილე და თვითდაზიანების რეჟიმში მყოფი მაღაროელების მუდმივი სამედიცინო კონტროლი შიმშილობისა და პროტესტის სხვა ფორმებით გამოწვეული თანმხლები გართულებების თავიდან ასაცილებლად.