რატომ არის მნიშვნელოვანი: 2 მარტს, როცა პარლამენტის შენობაში და მიმდებარედ მედიისა და არასამთავრობო სექტორის წარმომადგენლები რუსულ კანონპროექტს აპროტესტებდნენ, On.ge-ის რედაქტორი, ნეტგაზეთის ჟურნალისტი და ფორმულას ფოტოგრაფი საკანონმდებლო ორგანოს ეზოდან ფიზიკური ძალის გამოყენებით გააძევეს.

• სამივე მათგანზე დაშვებული იყო პარლამენტში საქმიანობის საშვი, შესაბამისად, ჟურნალისტებს პროფესიული მოვლენების კანონიერად შესრულებაში ხელი შეუშალეს.
• პარლამენტის ტერიტორიიდან გაძევებამდე, On.ge-ის რედაქტორი, თამუნა გეგიძე დაცვის თანამშრომელს უხსნიდა, რომ საშვი აქვს და ტერიტორიაზე კანონიერად იმყოფებოდა.
• მიუხედავად ამისა, მას საუბარი გააწყვეტინეს და 2-მა პირმა ტერიტორიიდან ძალის გამოყენებით გაიყვანა.
• ასეთივე მეთოდით გააძევეს იქვე მყოფი ნეტგაზეთის ჟურნალისტი, მიხეილ გვაძაბია და ფორმულას ფოტოგრაფი, ვახო ქარელი, რომლებსაც აკრედიტაცია ჰქონდათ.

დეტალები: 2023 წლის მარტის მოვლენების დროს დაზარალებული ჟურნალისტებისა და ოპერატორის ინტერესებს მედიაომბუდსმენი იცავს.

• 2 და 7-8-9 მარტს პარლამენტის მიმდებარე ტერიტორიაზე შსს-ს თანამშრომლების მხრიდან ჩადენილი სამსახურებრივი უფლებამოსილების ძალადობით შესაძლო გადამეტების ფაქტებზე, გამოძიება საქართველოს სსკ-ის 333-ე მუხლის მე-3 ნაწილის "ბ'' ქვეპუნქტით დაიწყო.
• ჟურნალისტები სპეციალურ საგამოძიებო სამსახურში გამოჰკითხეს.
• მოგვიანებით, საპროტესტო აქციების დაშლის საქმეზე კვალიფიკაცია დაზუსტდა.
• მედიაომბუდსმენისთვის მიწოდებული ოფიციალური ინფორმაციით: "გამოძიება გრძელდება საქართველოს შინაგან საქმეთა სამინისტროს ცალკეული თანამშრომლების მხრიდან, 2023 წლის 7-9 მარტს, ქ. თბილისში, საქართველოს პარლამენტის შენობის მიმდებარედ გამართულ საპროტესტო აქციის მონაწილეთა მიმართ განხორციელებული სამსახურებრივი უფლებამოსილების ძალადობით გადამეტების და ჟურნალისტისათვის პროფესიულ საქმიანობაში უკანონოდ ხელის შეშლის ფაქტებზე".

მედიაომბუდსმენი ითხოვდა, რომ ჟურნალისტების პარლამენტიდან გაძევების საქმეზეც დაზუსტებულიყო კვალიფიკაცია, თუმცა ამ დრომდე უშედეგოდ.

• შესაბამისად, პროკურატურას განმეორებით გაუგზავნა მოთხოვნა საქმეზე სისხლის სამართლის 154-ე, ჟურნალისტისათვის პროფესიულ საქმიანობაში უკანონოდ ხელის შეშლის მუხლით კვალიფიკაციის დაზუსტების შესახებ.
• მედიაომბუდსმენი ასევე ითხოვს ინფორმაციას საქართველოს პარლამენტში გატარებული ზომებისა და რეაგირების შესახებ, რადგან ინციდენტის შემდეგ ჟურნალისტებმა ოფიციალური წერილით პარლამენტის თავმჯდომარესაც მიმართეს.
• სპეციალური საგამოძიებო სამსახურის განმარტებით, იმის გათვალისწინებით, რომ ქარელი, გეგიძე და გვაძაბია არ წარმოადგენენ შესაძლო დანაშაულის მსხვერპლებს, მოკლებული არიან შესაძლებლობას, დააკმაყოფილონ მოთხოვნა სისხლის სამართლის საქმის მასალების გაცნობის თაობაზე.