დღეს მსოფლიოსა და საქართველოში სარეკლამო სფეროთი დაინტერესებული ახალგაზრდების რიცხვი სულ უფრო იზრდება. მათი მრავალფეროვანი შესაძლებლობებისა და უნარების წარმოსაჩენად უდიდესი მნიშვნელობა აქვს ისეთი კონკურსების ჩატარებას, როგორიც კანის ლომების ახალგაზრდული ფესტივალია.

კანის ლომების საერთაშორისო ფესტივალი ყველაზე მასშტაბური და მნიშვნელოვანი მოვლენაა მსოფლიო სარეკლამო სფეროში. კონკურსი ინდუსტრიით დაინტერესებულ ახალგაზრდებს თავიანთი შესაძლებლობების დემონსტრირებისა და საერთაშორისო ასპარეზზე თავის დამკვიდრების შესაძლებლობას აძლევს.

გთავაზობთ კანის ლომების წლევანდელი ღონისძიების შესახებ 5 საინტერესო ფაქტს:

1. წლევანდელ კონკურსში მონაწილეთა რეკორდული რაოდენობა დაფიქსირდა

კანის ლომების ფესტივალით დაინტერესება ყოველწლიურად იზრდება, რასაც რიცხვებიც მოწმობს. წელს პირველობისთვის ერთმანეთს 201 გუნდი ეჯიბრება. კონკურსის პირობების თანახმად, მონაწილე გუნდის ორივე წევრი ერთსა და იმავე კომპანიაში უნდა მუშაობდეს და მათი ასაკი 30 წელს არ უნდა აღემატებოდეს.

2. მონაწილეები ერთმანეთს 4 კატეგორიაში შეეჯიბრებიან

საქართველოში კანის ლომების ფესტივალი პირველად 2015 წელს ჩატარდა და მონაწილეებმა ნამუშევრები დიზაინის კატეგორიაში შექმნეს. წლევანდელ ფესტივალზე 201 გუნდი ერთმანეთს 4 კატეგორიაში ეჯიბრება. ესენია: დიჯიტალი, პრინტი, მარკეტერი და ფილმი. დიჯიტალის კატეგორიაში მონაწილეებს ციფრული კამპანიის შემუშავება ევალებათ. პრინტის კატეგორიის მონაწილეები პოსტერებს ქმნიან, ფილმის კატეგორიაში კი — 60-წამიან ვიდეოებს. მარკეტერის კატეგორიაში მონაწილე გუნდები ბრიფის შესაბამის პროდუქტს ან სერვისს ქმნიან და სააგენტოსთვის ბრიფს წერენ.

3. გამარჯვებულები საერთაშორისო მასშტაბით საქართველოს სახელით იასპარეზებენ

201 გუნდს შორის გამარჯვებულებს ჟიური 6 მაისს გამოავლენს. აღსანიშნავია, რომ კონკურსში გამარჯვებულები ივნისში მსოფლიოს 70-მდე ქვეყნის საუკეთესო მონაწილეებს საქართველოს სახელით შეეჯიბრებიან.

4. ფესტივალის ფარგლებში გამოვლინდება ნიკა გუჯეჯიანის სახელობის საპატიო ჯილდოს მფლობელი

გამარჯვებული გუნდების გარდა, ფესტივალის ფარგლებში ადამიანი, რომელსაც სხვების კრეატიული პოტენციალის გაღვივებაში განსაკუთრებული წვლილი მიუძღვის, ნიკა გუჯეჯიანის სახელობის საპატიო ჯილდოს მფლობელი გახდება. ნიკა გუჯეჯიანის სახელობის ჯილდო საქართველოში კანის შემოქმედებითი ფესტივალის ოფიციალურმა წარმომადგენლობამ 2019 წელს დააარსა.

5. მარკეტერისა და პრინტის კატეგორიების მონაწილეებს ბრიფი თიბისიმ მისცა

საქართველოში კანის ლომების ახალგაზრდული ფესტივალი წელს უკვე მერვედ ტარდება, თიბისი კი 2016 წლიდან ამ ღონისძიების მხარდამჭერია. წლევანდელ ფესტივალზე მარკეტერისა და პრინტის კატეგორიების მონაწილეებს ბრიფები სწორედ თიბისიმ მისცა. პრინტის კატეგორიაში გუნდებს ისეთი ნამუშევრების შექმნა დაევალათ, რომელიც ქართული რაგბის პოპულარიზაციასა და ქართველი მორაგბეების პოტენციალის ხაზგასმას ემსახურება. მარკეტერის კატეგორიის მონაწილეებს კი უნდა მოეფიქრებინათ, როგორ შეიძლება მომავლის პროფესიების ჭრილში განათლების ხელმისაწვდომობას შევუწყოთ ხელი.

"თიბისისთვის შემოქმედებითი ინდუსტრიის კონკურსებისა და ახალი თაობის ხელშეწყობა მნიშვნელოვანია, რასაც თიბისი არაერთი კრეატიული თუ საგანმანათლებლო პროექტის მხარდაჭერითა და ჩამოყალიბებით ახერხებს. მოხარულები ვართ, რომ თიბისი კანის ლომების სახით წელსაც ისეთი პროექტის მხარდამჭერია, რომელიც საქართველოში შემოქმედებითი კულტურის ჩამოყალიბებას, ქართველი ახალგაზრდების განვითარებასა და ახალი თაობის საერთაშორისო ასპარეზზე გასვლას უწყობს ხელს", — ამბობს თიბისის სტრატეგიული პროექტების ლიდერი ალექსანდრე მაყაშვილი.