ამის შესახებ ინფორმაციას რუსული მედიები ავრცელებენ.

რატომ არის მნიშვნელოვანი: თამარა გვერდწითელი წლების განმავლობაში რუსეთში მოღვაწეობდა.

  • უკრაინაში მიმდინარე ომის ფონზე გვერდწითელმა, სხვა წარმოშობით ქართველ მომღერლებთან ერთად, 2022 წლის 4 მარტს კრემლში იმღერა, 6 მარტს კი მორიგ კონცერტში აპირებდა მონაწილეობის მიღებას.
  • ამის ფონზე გვერდწითელის ვარსკვლავი უკრაინის დროშის ფერებში შეღებეს.
  • ტელეგრამ არხი Mash წერს, რომ რუსეთის ფედერაციის სახალხო არტისტს თამარა გვერდწითელს რუსეთის მოქალაქეობის ჩამორთმევა მოსთხოვეს და აქტივისტებმა საგამოძიებო კომიტეტს და გენერალურ პროკურატურას მიმართეს.
  • რუსეთის მამების აქტივისტი ანდრეი ზგონნიკოვი ამბობს, რომ რუსული საზოგადოების საყვარელი ვარსკვლავი, რბილად რომ ვთქვათ, ცუდად იქცევა.
  • აქტივისტი უკრაინაში შეჭრასა და ომს სპეციალურ სამხედრო ოპერაციად მოიხსენიებს და ამბობს, რომ ამის შემდეგ გვერდწითელმა გააუქმა ტური რუსეთში და ქვეყნიდან გაემგზავრა.

დეტალები: გამოცემის თქმით, გვერდწითელისთვის მოქალაქეობის ჩამორთმევა უნდათ, რომ რუსეთში ფულის საშოვნელად არ დაბრუნდეს.

  • მომღერლის წარმომადგენელი გამოეხმაურა მოქალაქეობის ჩამორთმევას და თქვა, რომ ეს იდიოტიზმია და ასეთ ინფორმაციასა და განცხადებებს გვერდწითელი არ უნდა გამოეხმაუროს, რადგან ამაზე კომენტარის გაკეთება არ ღირს.
  • მედიის ცნობით, აქტივისტებმა ადრე მიმართეს საგამოძიებო კომიტეტს და გენერალურ პროკურატურას თამარა გვერდწითელს რუსეთის მოქალაქეობის ჩამორთმევის მოთხოვნით.
  • ისინი აღშფოთებულნი იყვნენ იმით, რომ შემსრულებელი "სპეცოპერაციის დაწყების" შემდეგ საზღვარგარეთ გაფრინდა და შეერთებულ შტატებში რუსულ ენაზე ჰიტების შესრულებას აპირებდა.
  • რუსული მედია 25 აპრილს წერდა, რომ სახელმწიფო დუმამ ვერ ნახა საფუძველი თამარა გვერდწითელს რუსეთის მოქალაქეობის ჩამორთმევისთვის.

რუსული მედია დუმის დეპუტატის, სერგეი სოლოვიოვის კომენტარს ავრცელებს, სადაც ნათქვამია, რომ მომღერალ თამარა გვერდწითელს რუსეთის მოქალაქეობის ჩამორთმევის მიზეზს ვერ ხედავს.

  • მისი თქმით, რუსეთში ტურნეს გაუქმება და მომღერლის შეერთებულ შტატებში გასვლის სურვილი ჯერ კიდევ არ არის იმის მიზეზი, რომ შემსრულებელს რუსული პასპორტი ჩამოერთვას.
  • თუმცა, მისი ვარაუდით, შეიძლება აზრი ჰქონდეს გვერდწითელს რუსეთში გამოსვლის აკრძალვას.
  • სოლოვიოვი დარწმუნებულია, რომ არსებულ ვითარებაში ხელოვანებმა მხარი უნდა დაუჭირონ რუსეთს თავიანთი შემოქმედებით — ან ღიად ისაუბრონ რუსეთის შეიარაღებული ძალების მხარდასაჭერად, ან კონცერტები გამართონ.