მუმია, რომლის ასაკიც სავარაუდოდ 600-დან 800 წლამდეა, პერუს პოლიციამ საკვების გადასატან ჩანთაში აღმოაჩინა.

რატომ არის მნიშვნელოვანი: პერუში, სადაც სხვადასხვა ცივილიზაციების ასობით არქეოლოგიური ცენტრია თავმოყრილი, სხვადასხვა დროს რამდენიმე მუმია აღმოაჩინეს.

  • ნაპოვნი მუმიფიცირებული ნაწილები კულტურის სამინისტროში გადაიტანეს, როგორც ეროვნული კულტურული აქტივი.
  • კაცი, რომელსაც მუმია გადაჰქონდა პერუს კულტურული მემკვიდრეობის წინააღმდეგ შესაძლო დანაშაულის ბრალდებით დააკავეს.

დეტალები: პოლიციამ მუმია შაბათს იპოვა, როცა პერუს ქალაქ პუნოში, ნასვამ მდგომარეობაში მყოფი პირი შემოწმების მიზნით შეაჩერა.

  • 26 წლის კაცის საკვების გამაგრილებელ ჩანთაში უძველესი მუმიის ნაშთი აღმოაჩინეს.
  • კაცმა ადგილობრივ მედიასთან განაცხადა, რომ ძვლებს ხუანიტა შეარქვა და სულიერ შეყვარებულად მიიჩნევდა. მან ნაშთი ჩანთით გადაჰქონდა, რათა მეგობრებისთვის ეჩვენებინა.
  • კაცმა განმარტა, რომ მუმია ხუანიტას, რომელიც მამისგან მემკვიდრეობით ერგო, თავის ოთახში, ყუთში ინახავდა.
  • პერუს საინფორმაციო სააგენტოს განაცხადებით, მუმია მამრობითი სქესის აღმოჩნდა, რომელიც სავარაუდოდ, გარდაცვალების დროს 45 წელზე მეტი ასაკის იყო.
  • მუმია ნაყოფის პოზაში იყო გახვეული, რაც ამ მხარეში წინა ესპანური სამარხებისთვისაა დამახასიათებელი.