ცოტა ხნის წინ On.ge-სთვის ცნობილი გახდა, რომ სერიალი ხელოვნური სუნთქვა, შესაძლოა, საზოგადოებრივ მაუწყებელზე გაგრძელდეს. თუმცა, როგორც გაირკვა, ეს ინფორმაცია არხის ხელმძღვანელისთვის, ვასილ მაღლაფერიძისთვის სიახლე აღმოჩნდა და პირველად სწორედ ჩვენგან გაიგო.

"ჩვენთან სიტყვის თავისუფლებაა და ირაკლის საღინაძემ რაც გითხრათ ეგ შეგიძლიათ დაწეროთ, მაგრამ მე პირველად თქვენთან წავიკითხე ეს ამბავი", - გვითხრა ვასილ მაღლაფერიძემ.

On.ge კიდევ ერთხელ დაუკავშირდა სერიალის პროდიუსერ ირაკლი საღინაძეს.

"მე, ირაკლი საღინაძე, ვერაფრით გავაკეთებ ვასიკო მაღლაფერიძის ინფორმირებულობაზე კომენტარს, მაგრამ კიდევ ერთხელ ვადასტურებ, რომ საზოგადოებრივ არხს მიღებული აქვს ჩვენგან წინადადება და გაგზავნილი აქვთ პრეზენტაცია. სამწუხაროა თუ ვასილ მაღლაფერიძემ ეს არ იცოდა, მაგრამ ჩავთვალოთ, ჩემი განცხადებით ჩვენი მხრიდან შეთავაზება გაჟღერებულია. მზად ვარ პირადად გავუგზავნო ვასილ მაღლაფერიძეს პრეზენტაცია ან შევხვდე და გავაცნო ჩვენი ხედვა და ამ პროექტის შესაძლებლობები.", - თქვა საღინაძემ.

შეგახსენებთ, ჯერ კიდევ დეკემბერში ცნობილი გახდა, რომ სერიალ ხელოვნური სუნთქვის გადაღებები აღარ გაგრძელდებოდა.

მაშინ სერიალის პროდიუსერი ირაკლი საღინაძე ამბობდა, რომ შოუს შეჩერების მიზეზი რუსთავი 2-ის ყადაღა და ქვეყანაში შექმნილი ფინანსურ მდგომარეობა იყო.

ცოტა ხნის შემდეგ კი ქართველი მაყურებლისთვის სასიხარულო ინფორმაცია გაჟღერდა. ვრცელდებოდა ინფორმაცია, რომ შეჩერებულმა სერიალმა სპონსორი იპოვა და გრძელდებოდა, თუმცა როგორც გაირკვა, სიხარული ნაადრევი აღმოჩნდა.