ინფორმაცია On.ge-ს საგარეო უწყებაში დაუდასტურეს.

რატომ არის მნიშვნელოვანი: 24 იანვარს, ევროპეისკა პრავდასთან ინტერვიუში უკრაინის ელჩმა საქართველოში, ანდრეი კასიანოვმა განაცხადა, რომ გამორიცხული არ არის საქართველოდან მათი მოქალაქეების ევაკუაცია დაიწყონ, თუ მათ საფრთხე დაემუქრებათ საქართველოსა და რუსეთს შორის პირდაპირი ფრენების აღდგენისა და ოკუპანტი ქვეყნის მოქალაქეების მასობრივი შემოდინების გამო.

  • ელჩი ხაზს უსვამს, რომ ეს მხოლოდ რეალური საფრთხის შემთხვევაში მოხდება.
  • ამავე ინტერვიუში კასიანოვი ამბობს, რომ საქართველოს შემხვედრი ქმედებები რუსეთთან ძირს უთხრის ორი ქვეყნის თანამშრომლობას.

დეტალები: საგარეო საქმეთა სამინისტროში აცხადებენ, რომ ანდრეი კასიანოვი მის მიერ გაკეთებული განცხადებების "ახსნა-განმარტებისთვის" დაიბარეს.

  • "ორმხრივი ურთიერთობის სხვა საკითხები ამ შეხვედრაზე განხილული არ იქნება", — ამბობენ უწყებაში.

ინტერვიუში კასიანოვი აღნიშნავს, რომ საქართველოში რუსეთის მოქალაქეების "ანომალიური" შემოსვლის ფონზე, უკრაინის საელჩო ყველანაირად ცდილობს, თავისი მოქალაქეების უსაფრთხოებასა და სამშობლოში დაბრუნებაზე იზრუნოს.

  • "პირდაპირი საჰაერო კომუნიკაციის აღდგენისა და უსაფრთხოების რეალური რისკების ზრდის შემთხვევაში, მინდა, ვთქვა, რომ დღეს საელჩო არ გამორიცხავს საერთაშორისო ორგანიზაციებთან, ჩვენს საერთაშორისო პარტნიორებთან დაკავშირების შესაძლებლობას, რათა განიხილონ მასობრივი დახმარების შესაძლებლობა, უკრაინის მოქალაქეების ევაკუაცია საქართველოს ტერიტორიიდან", — განაცხადა კასიანოვმა.
  • მისივე თქმით, განიხილავენ ევაკუაციის მარშრუტების მოწყობის შესაძლებლობას უკრაინის მოსახლეობის ყველაზე დაუცველი სეგმენტებისთვის, რომლებსაც არ აქვთ სამშობლოში დაბრუნების საშუალება.
  • ელჩი ამისათვის ოპტიმალურად სახმელეთო ტრანსპორტს მიიჩნევს.

კონტექსტი: რუსეთის საგარეო საქმეთა მინისტრმა, სერგეი ლავროვმა 18 იანვარს გამართულ პრესკონფერენციაზე იმედი გამოთქვა, რომ რუსეთსა და საქართველოს შორის პირდაპირი ფრენები მალე აღდგება.

  • ლავროვს გამოეხმაურა ქართული ოცნების ფრაქციის თავმჯდომარე — ირაკლი კობახიძემ განაცხადა, რომ ფრენების აღდგენა მისასალმებელი იქნება.
  • პრეზიდენტმა, სალომე ზურაბიშვილმა მმართველი გუნდის ამ პოზიციას გაუგებარი უწოდა და თქვა, რუსეთთან ოკუპანტ სახელმწიფოსთან ავიამიმოსვლის აღდგენის წინააღმდეგია.