საქართველოს შინაგან საქმეთა სამინისტრო აცხადებს, რომ ბრალდებულმა დ.გ-მ ფიზიკური დაზიანებები დაკავებამდე მიიღო და მას პოლიციის მიმართ პრეტენზია არ დაუფიქსირებია. თავის მხრივ, საქართველოს სახალხო დამცველმა თქვა, რომ დ.გ-ს დაკავებისას პოლიციელებმა ფიზიკური შეურაცხყოფა მიაყენეს და მას სექსუალური ძალადობით დაემუქრნენ. ფაქტთან დაკავშირებით გამოძიება მთავარმა პროკურატურამაც დაიწყო.

შსს-მ მომხდართან დაკავშირებით თავისი ვერსია გაავრცელა, რომლის მიხედვითაც, დ.გ.-მ 5 ივნისს, გლდანში სცადა მოქალაქე ი.ქ.-ს დაყაჩაღება. ი.ქ. არის შსს-ს ყოფილი თანამშრომელი, რომელსაც აქვს გავლილი სპეციალური მომზადება, მან ფიზიკური წინააღმდეგობა გაუწია დ.გ.-ს, განაიარაღა ის და გამოიძახა პოლიცია. შსს-ს ცნობით, განიარაღების დროს ი.ქ.-მ და დ.გ.-მ, მიიღეს სხეულის დაზიანებები.

სამართალდამცავი უწყებისვე თქმით, იზოლატორში შესახლების დროს დ.გ.-ს ჩაუტარდა პირველადი სამედიცინო შემოწმება. ექიმთან გასაუბრებისას დ.გ.-მ განაცხადა, რომ დაზიანებები მიიღო დაკავებამდე, ჩხუბის დროს და პოლიციის მიმართ პრეტენზია არ გააჩნდა. აღნიშნულ დოკუმენტს დაკავებულმა თავად მოაწერა ხელი.

საქართველოს სახალხო დამცველმა 7 ივნისს, დ.გ.-ზე დაყრდნობით თქვა, რომ დაკავებისას და განყოფილებაში გადაყვანის შემდეგაც, რამდენიმე პოლიციელმა დ.გ.-ს მიაყენა ფიზიკური და სიტყვიერი შეურაცხყოფა. ასევე, მას ემუქრებოდნენ სექსუალური ძალადობით. ომბუდსმენმა პროკურატურას ამ საქმის გამოძიებისკენ მოუწოდა.

საქართველოს მთავარმა პროკურატურამ ამ საქმის გამოძიება სამსახურებრივი უფლებამოსილების გადამეტების მუხლით დაიწყო.

აცხადებენ, რომ იმ პოლიციელის მიმართ, რომელზეც პროკურატურამ გამოძიება დაიწყო, პრეტენზია არ დაფიქსირებულა. ამის შესახებ შსს-მ ინფორმაცია პროკურატურისა და სახალხო დამცველის აპარატის მიერ გავრცლეებული განცხადებების შემდეგ გაავრცელა.

"ბრალდებულს პოლიციის თანამშრომლების მიმართ პრეტენზია არ დაუფიქსირებია, რაც დაადასტურა შსს-ს დროებითი მოთავსების იზოლატორში შესახლებისას," - აღნიშნავენ შსს-ში. უწყების ცნობით, ექიმთან გასაუბრებისას დ.გ.-მ განაცხადა, რომ დაზიანებები მიიღო დაკავებამდე, ჩხუბის დროს და პოლიციის მიმართ პრეტენზია არ გააჩნდა. აღნიშნულ დოკუმენტს დაკავებულმა თავად მოაწერა ხელი.

რამდენიმე საათის წინ პროკურატურამ განაცხადა, რომ ისინი იძიებდნენ პოლიციელის მხრიდან შესაძლო ძალადობას. კერძოდ, თბილისის დროებითი მოთავსების იზოლატორში განთავსებულმა ბრალდებულმა დ.გ.-მ 2017 წლის 5 ივნისს საქართველოს სახალხო დამცველის რწმუნებულთან შეხვედრისას განაცხადა, რომ იგი 2017 წლის 5 ივნისს, დაახლოებით დილის 3–დან 4 საათზე დააკავეს თბილისის პოლიციის დეპარტამენტის გლდანი–ნაძალადევის სამმართველოს მე–10 განყოფილების თანამშრომლებმა. დაკავებისას და განყოფილებაში გადაყვანის შემდეგაც, რამდენიმე პოლიციელმა მიაყენა ფიზიკური და სიტყვიერი შეურაცხყოფა. ასევე, ემუქრებოდნენ სექსუალური ძალადობით. დ.გ.–ს თქმით, იგი დილის 9 საათისთვის დროებითი მოთავსების იზოლატორში შეიყვანეს, თუმცა მრავლობითი დაზიანების გამო არ მიიღეს. დ.გ. სამედიცინო დახმარების აღმოჩენის მიზნით სამედიცინო კლინიკაში გადაიყვანეს და იზოლატორში მხოლოდ საღამოს, დაახლოებით 20:20 საათზე შეასახლეს.