პროკურატურა საქართველოს შინაგან საქმეთა სამინისტროს თანამშრომლის მიერ დაკავებისას მოქალაქის მიმართ შესაძლო ძალადობას იძიებს. ამის შესახებ განცხადება პროკურატურამ გაავრცელა, რითაც სახალხო დამცველის რეკომენდაციას გამოეხმაურა ამ საქმეზე გამოძიების დაწყების შესახებ.

პროკურატურის ინფორმაციით, გამოძიება დაკავებულის მოხსენებითი ბარათის საფუძველზე დაიწყო. უწყებაში აღნიშნავენ, რომ პროკურორმა ბრალდებულის ინფორმაციით იხელმძღვანელა, რომელიც თბილისის საქალაქო სასამართლოში გაჟღერდა. ის ამბობდა, რომ პოლიციის გლდანის რაიონის თანამშრომლებმა ის გლდანის სასაფლაოების მიმდებარე ტერიტორიაზე მიაყენეს სიტყვიერი და ფიზიკური შეურაცხყოფა.

"ამ ეტაპზე აქტიურად ტარდება შესაბამისი საგამოძიებო და საპროცესო მოქმედებები, რომელთა ამოწურვის შემდეგ მიღებული იქნება შემაჯამებელი გადაწყვეტილება, რის შესახებაც დამატებით ეცნობება საზოგადოებას," - აღნიშნავენ პროკურატურაში.

საქმეზე გამოძიება სისხლის სამართლის კოდექსის 333-ე მუხლის მესამე ნაწილის "ბ" ქვეპუნქტით მიმდინარეობს. ამ მუხლით, სამსახურებრივი უფლებამოსილების გადამეტება არაერთგზის სახელმწიფო-პოლიტიკური თანამდებობის მქონე პირის მიერ ისჯება თავისუფლების აღკვეთით ვადით ხუთიდან რვა წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.