პარლამენტის დეპუტატის, ირაკლი ხახუბიას შვილის, ბექა ხახუბიას ავტოავარიაში დაღუპვის საქმეზე შიდა ქართლის პოლიციის ორი ხელმძღვანელი გაათავისუფლეს. შინაგან საქმეთა სამინისტროს ინფორმაციით, ყოფილი მაღალჩინოსნები კადრების განყოფილებაში არიან გადაყვანილნი, რაც იმას ნიშნავს, რომ ისინი უწყების რიგებში კვლავ ირიცხებიან, თუმცა გაფრთხლებულები არიან სამსახურიდან გათავისუფლების შესახებ.

17 მაისს, სავარაუდოდ, პოლიციის ეკიპაჟის დევნის დროს, ქართული ოცნების დეპუტატის, ირაკლი ხახუბიას შვილი, ბექა ხახუბია ავტო ავარიაში დაიღუპა.

რეფორმირების ცენტრის ხელმძღვანელი, ზვიად კუპრავას მტკიცებით, 21 წლის ბექა ხახუბია პოლიციის უკანონო ქმედებას შეეწირა. კუპრავა წერდა, რომ პოლიციის დევნის დროს, გორის გვირაბის გასასვლელში გაჩერებულ სატვირთო ტრაილერის მძღოლს, გორის საპატრულო პოლიციის თანამშრომლებმა ჩამოართვეს სატვირთო მანქანა და ჩახერგეს გორის გვირაბის გასასვლელი. მისივე ცნობით, დიდი სისწრაფით მოძრავმა ბექა ხახუბიამ, რომელიც უკვე განათებული გვირაბიდან სიბნელეში გამოდიოდა, ვერ შეამჩნია ტრაილერი და მაქსიმალური სიჩქარით შეეჯახა მას.

თავდაპირველად საქმის გამოძიება შსს-მ დაიწყო, თუმცა მოგვიანებით პროკურატურამ გადაიბარა. ძიება 276-ე მუხლის მეხუთე ნაწილით მიმდინარეობს, რაც გულისხმობს ავტოტრანსპორტის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.