სულ რაღაც 3 დღეში ჩეჩნეთის მმართველს სხვა სურვილები გაუჩნდა და რეკორდის მოხსნა გადაწყვიტა.

რატომ არის მნიშვნელოვანი: კადიროვი ჩეჩნეთის რესპუბლიკას 2007 წლიდან, უკვე 15 წელია ხელმძღვანელობს.

  • მისი ძალაუფლება ზეწოლებზე, ძალადობასა და იძულებებზეა დაფუძნებული;
  • ვლადიმერ პუტინის უპირობო ერთგულება კადიროვმა არაერთხელ, მათ შორის, რუსეთის მიერ უკრაინაში შეჭრის შემდეგ დაადასტურა.

შეგახსენებთ: 3 სექტემბერს ვიდეომიმართვაში მან თქვა, რომ დროა წასვლაზე იფიქროს, რადგან გაიგო, რომ რუსეთის ფედერაციის ერთეულების ამჟამინდელ ხელმძღვანელებს შორის ყველაზე "ხანგრძლივმოქმედია".

  • "ჩვენ, კავკასიელებს, ჩეჩნებს გვაქვს ანდაზა — როგორი პატივსაცემი და ნანატრიც არ უნდა იყოს სტუმარი, თუ ის დროულად მიდის, კიდე უფრო სასიამოვნოა. ამიტომ, ვფიქრობ, რომ ჩემი დროც მოვიდა, დონ. სანამ არ გამაგდეს, დონ".

  • იქვე აცხადებდა, რომ უნდა აიღოს "ხანგრძლივი და დამსახურებული შვებულება".

ახლა კადიროვი ძველ ანდაზებს არ იყენებს და მხოლოდ ახალ ამბიციებზე საუბრობს — სურს აქამდე ყველაზე "ხანგრძლივმოქმედი" ლიდერის, 27-წლიანი მმართველობის რეკორდი მოხსნას.

  • უარს ამბობს ხანგრძლივ შვებულებაზეც და ამტკიცებს, რომ წლევანდელ კუთვნილ შვებულებასაც კი არ აიღებს.

სტრიქონებს შორის: კადიროვის პირველი ვიდეომიმართვაც არ ქმნიდა იმის მოლოდინს, რომ წასვლა სერიოზულად გადაწყვიტა, თუმცა ახლა მისი რიტორიკა შეცვლილია და ჩნდება განცდა, რომ ნაჩქარევი გადაწყვეტილებების გამო თავს იმართლებს.

  • ამბობს, რომ ახლა, როცა რუსეთი საომარ მოქმედებებშია შვებულებაში წასვლა არ შეიძლება არც რეგიონების ხელმძღვანელებისთვის და არც სამხედრო მოსამსახურეებისთვის.
  • "სინამდვილეში, რა თქმა უნდა, არ მაქვს უბრალოდ წასვლის უფლება. ხალხმა მანდო რეგიონის ხელმძღვანელობა და ამ ნდობის გამართლება ჩემი წმინდა მოვალეობაა. შემიძლია წავიდე მხოლოდ მაშინ, როცა ხალხსა და რუსეთის პრეზიდენტს ვკითხავ", — წერს ის.