საგანგებო სიტუაციების წარმომადგენლის, თემურ მღებრიშვილის განცხადებით, ადგილზე 200-მდე მეხანძრე მაშველი და ამდენივე თავდაცვის სამინისტროს გვარდიის დანაყოფია მობილიზებული.

რატომ არის მნიშვნელოვანი: ხანძარი ყვარლის მუნიციპალიტეტში, სოფელ შილდასთან ახლოს გუშინ გაჩნდა — ცეცხლი ფოთლოვანი ტყის საფარს უკიდია.

  • ბოლო კვირების განმავლობაში საქართველოში ხანძრებს ებრძვიან — მათ შორის, ყველაზე მასშტაბური ბორჯომის ხეობაშია, რომელიც ამ ეტაპზე ლოკალიზებულია, მაგრამ ქრობის სამუშაოები ჯერ კიდევ გრძელდება;
  • გარდა ამისა, 28 აგვისტოს მხოლოდ თბილისში ხანძრის ოთხი კერა დაფიქსირდა: ავჭალაში, სამგორში, დიდუბესა და შავნაბადაზე;
  • ამავე დღეს ორი კერა იყო ოკუპირებული ცხინვალის რეგიონშიც.

საგანგებოს ცნობით, სალიკვიდაციო-სალოკალიზაციო სამუშაოები აქტიურად მიმდინარეობს.

  • ხანძრის ქრობის სამუშაოებში დამატებით ჩართულია სამი ვერტმფრენი;
  • მღებრიშვილის თქმით, მთელი ღამის განმავლობაში გრძელდებოდა გზების გაყვანა ტყის მასივში, რათა ადგილზე სახანძრო ტექნიკა შეიყვანონ;
  • მისივე თქმით, ამ დროისთვის, გავრცელების საფრთხე მოხსნილია და მოსახლეობას საფრთხე არ ემუქრება.