ბრიტანეთის დაზვერვა წერს, რომ ხერსონის რეგიონში უკრაინის შეიარაღებული ძალების ქმედებები რუსული ჯარისთვის, სავარაუდოდ, ტაქტიკური მოულოდნელობა იყო.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა და ხერსონის რეგიონში შეიარაღებულმა ძალებმა რუსების თავდაცვის პირველი ხაზი გაარღვიეს.

  • ხერსონი რუსეთისთვის მნიშვნელოვანი რეგიონია, რადგან სწორედ ამ ტერიტორიის დახმარებით ოკუპირებული ყირიმიდან საბრძოლო იარაღისა და პერსონალის მიწოდებას ახდენს.
  • რუსეთი ომის დაწყებიდან აქტიურად უტევდა ხერსონის რეგიონს. მტრის ჯარები ქალაქში პირველ მარტს შეიჭრნენ, თუმცა საკრებულოს დაკავება 25 აპრილამდე ვერ შეძლეს.
  • ხერსონის მოსახლეობა მასობრივ აქციებს აწყობდა და ოკუპაციას აპროტესტებდა. ხელისუფლების ინფორმაციით, რეგიონში ახლა მოსახლეობის 40-50%-ია დარჩენილი.
  • დიდი ბრიტანეთის დაზვერვა აცხადებს, რომ ხერსონის დაკარგვა ძირს უთხრის რუსეთის მცდელობებს, ომი წარმატებულად წარმოაჩინოს.

დეტალები: უწყების ცნობით, უკრაინის შეიარაღებულმა ძალებმა მათ სასარგებლოდ გამოიყენეს რუსეთის არმიაში არსებული ლოგისტიკური და ხელმძღვანელობითი სისუსტეები.

  • დაზვერვა წერს, რომ ამ შეტევის ერთ-ერთი ელემენტია მიმდინარე წინსვლა მდინარე დნიპროს დასავლეთით ფართო ფრონტზე, რომელიც რუსეთის მიერ ოკუპირებული ხერსონის რეგიონის სამ მიმართულებაზეა ფოკუსირებული;

  • მათი განცხადებით, ბრძოლები გრძელდება დონბასსა და ხარკოვშიც, ამიტომ უახლოეს დღეებში რუსულ სარდლობას მოუწევს გადაწყვიტოს, სად მიმართონ საბრძოლო რეზერვები.

სამხრეთით ბრძოლა გრძელდება — უკრაინული მედიის ცნობით, 2 სექტემბრის დილას ოკუპირებულ ხერსონში, სულ მცირე, 6 აფეთქების ხმა იყო.

  • უკრაინა აცხადებს, რომ მათი კონტრშეტევის დაწყების შემდეგ, ხერსონში ოკუპანტებმა "მნიშვნელოვანი დანაკარგები" განიცადეს;
  • "ადამიანური ძალის დანაკარგი ათეულიდან ასეულამდე გაიზარდა. დამწვარია აღჭურვილობაც", — განაცხადა სამხრეთში უკრაინის ჯარის სპიკერმა;
  • "შესაბამისად, ჩვენი წარმატებები საკმაოდ დამაჯერებელია. ვფიქრობ, ძალიან მალე პოზიტიური ინფორმაციის გავავრცელებთ", — თქვა მან.